फोटो सौजन्य : criative commens
| सांगली समाचार वृत्त |
सांगली - दि. २२ मे २०२५
मंगळवारी जोरदार पावसाने सांगली शहर आणि परिसर धुवून निघाले. बुधवारीही दुपारनंतर पावसाचा जोर कायम राहिला, ज्यामुळे शहरातील अनेक भागात पाणी साचले आणि लोकांचे दैनंदिन कामकाज ठप्प झाले आहे. ग्रामीण भागातील लोक मात्र पाऊस थांबण्याची आतुरतेने वाट पाहत आहेत.
काल संध्याकाळी अचानक जोरदार पाऊस झाला आणि तो रात्री उशिरापर्यंत अखंड सुरू होता. पहाटे पावसाला विराम मिळाला, मात्र दुपारी तीन वाजल्यापासून पुन्हा सरी कोसळू लागल्या. संध्याकाळपर्यंत पावसाचा सूर कायम राहिला. सांगलीतील राजवाडा चौक, स्टेशन रोड, सिटी पोस्ट आणि शामरावनगर परिसरात रस्त्यांवर पाणी साचलेले आहे, ज्यामुळे वाहनचालकांनाही मोठा त्रास सहन करावा लागत आहे.
शहरातील महत्त्वाच्या भागांमध्ये मारुती रोड, छत्रपती शिवाजी महाराज पुतळा, बसस्थानक, शिवाजी स्टेडियम, स्टेशन चौक, सिव्हील चौक, चैत्र बन, आनंदनगर, टिंबर एरिया, विजयनगर तसेच मिरज येथील छत्रपती शिवाजी महाराज स्टेडियम, मंगल चित्रपट गृह, अण्णा भाऊ साठे पुतळा, वंटमुरे कॉर्नर या भागात पाणी साचले आहे. या ठिकाणांची पाहणी आयुक्त सत्यम गांधी यांनी केली असून त्यांनी पाणी निचरा करण्यासाठी तातडीने उपाययोजना करण्याचा आदेश दिला. जलनिस्सारण विभागाचे कार्यकारी अभियंता चिदानंद कुरणे, शहर अभियंता त्रतुराज यादव आणि आपत्ती व्यवस्थापन सहायक आयुक्त नकुल जकाते यांचाही या वेळी सहभाग होता.
ग्रामीण भागातही पावसाचा जोर कायम असून, सलग पाऊस पडत राहिला तर माळरानात नीर साचण्याची शक्यता वाढली आहे. शेतकऱ्यांनी सांगितले की, पुढील आठ दिवस शेतात जाणे कठीण होईल कारण काळी माती भरपूर भिजलेली आहे. सध्या सांगलीतील जनजीवन पावसामुळे प्रभावित झाले असून, पाऊस थांबण्याची नागरिकांना मोठी अपेक्षा आहे.
