फोटो सौजन्य : दै. ललकार
| सांगली समाचार वृत्त |
सांगली - दि. २० मे २०२५
मातृत्वाचं निस्वार्थ रूप दाखवणारी एक विलक्षण घटना महाराष्ट्रात घडली आहे. सविता पवार या धाडसी मातेनं आपल्या 20 वर्षीय मुलाला, रोहन रमेश पवार याला, मृत्यूच्या छायेतून परत आणण्यासाठी आपल्या शरीराचा एक भाग – यकृत – दान केला.
रोहनला "विल्सन्स डिसीज" नावाच्या दुर्मिळ व गंभीर आजाराने ग्रासले होते. या आजारामध्ये शरीरात कॉपर (तांबं) साचत जातं आणि अखेर यकृत निकामी होतं. रोहनची तब्येत इतकी ढासळली होती की, तात्काळ यकृत प्रत्यारोपणाशिवाय पर्यायच नव्हता.
मुंबई सेंट्रल येथील वोक्हार्ट हॉस्पिटलमध्ये दाखल झाल्यानंतर, तिथल्या लिव्हर ट्रान्सप्लांट तज्ज्ञ डॉ. स्वप्नील शर्मा व त्यांच्या वैद्यकीय पथकाने तातडीने तपासणी केली. त्यातून रोहनच्या जीवाला वाचवायचं असेल, तर प्रत्यारोपणच एकमेव मार्ग असल्याचं स्पष्ट झालं.
आई सविता यांनी क्षणाचाही विलंब न करता मुलाच्या जीवासाठी आपला यकृत दान करण्याचा निर्णय घेतला. सर्व वैद्यकीय चाचण्या पार करून त्या एक योग्य दाता असल्याचं सिद्ध झाल्यावर, दोन आठवड्यांपूर्वी ही गुंतागुंतीची पण यशस्वी शस्त्रक्रिया पार पडली. विशेष म्हणजे, या शस्त्रक्रियेमध्ये रक्त चढविण्याची गरजही भासली नाही.
सविता पवार म्हणाल्या, "आई म्हणून माझ्या मुलासाठी काहीही करण्याची तयारी होती. यकृताचा एक भाग दान करणं, हे माझ्यासाठी अगदी सहज आणि नैसर्गिक होतं."
शस्त्रक्रियेनंतर रोहनची प्रकृती हळूहळू सुधारत आहे. यकृताचे कार्य पूर्ववत होत असून, तो नवजीवनाकडे वाटचाल करत आहे. “आईचं प्रेम आणि तिचा आत्मविश्वास यांच्यामुळेच आज मी जिवंत आहे,” असं रोहनने सांगितलं. त्याने डॉक्टरांचेही आभार मानले, ज्यांनी वेळेत योग्य उपचार करून ही संधी उपलब्ध करून दिली.
डॉ. शर्मा म्हणाले, “हे प्रकरण केवळ वैद्यकीय यशाचं प्रतीक नाही, तर आईच्या अटळ प्रेमाचं आणि तिच्या निष्ठेचं मूर्त स्वरूप आहे. वेळेवर योग्य निर्णय घेतल्यास अशा गंभीर अवस्थांमध्येही जीव वाचू शकतो.”
ही कहाणी केवळ एका कुटुंबाच्या जिद्दीची नाही, तर आधुनिक वैद्यकीय उपचारांच्या सामर्थ्याचीही साक्ष आहे. वोक्हार्ट हॉस्पिटल, मुंबई सेंट्रल हे भारतातील अग्रगण्य लिव्हर ट्रान्सप्लांट केंद्रांपैकी एक असून, आता सांगली, कराड आणि कोल्हापूरमध्ये सुपर स्पेशालिटी ओपीडी सुरू करून अधिकाधिक रुग्णांपर्यंत पोहोचण्याचा प्रयत्न करत आहे.
