| सांगली समाचार वृत्त |
नवी दिल्ली - सोमवार दि. ४ ऑगस्ट २०२५
दिल्लीतील राजकीय वातावरण सध्या प्रचंड गतिमान झाले असून, संसदेचे पावसाळी अधिवेशन गाजत आहे. बिहारमधील एसआयआर प्रकरणावरून संसदेमध्ये मोठा गदारोळ झाला आहे. त्याच पार्श्वभूमीवर पंतप्रधान नरेंद्र मोदी आणि केंद्रीय गृहमंत्री अमित शहा यांनी राष्ट्रपती द्रौपदी मुर्मू यांची स्वतंत्रपणे भेट घेतल्याने राजकीय वर्तुळात विविध चर्चांना उधाण आले आहे.
एका दिवसात दोन उच्चपदस्थ नेत्यांनी राष्ट्रपतींची भेट घेणे ही केवळ एक योगायोगाची घटना नसून, त्यामागे काही गंभीर राजकीय हालचाली सुरू असल्याची शक्यता वर्तवली जात आहे. सामान्यपणे अशा भेटी औपचारिक असल्या तरी सध्याच्या राजकीय पार्श्वभूमीवर या भेटी विशेष महत्त्वाच्या ठरत आहेत.
विश्लेषकांच्या मते, केंद्र सरकार एखादा दूरगामी निर्णय घेण्याच्या तयारीत आहे. संभाव्य घटनात्मक बदल, मोठ्या नियुक्त्या किंवा उपराष्ट्रपती पदासाठी होणारी निवडणूक याबाबतचा प्रारूप संवाद या भेटीमधून घडून आला असण्याची शक्यता नाकारता येत नाही. सत्ताधाऱ्यांकडून अद्याप यासंदर्भात कोणतीही अधिकृत माहिती देण्यात आलेली नाही. मात्र, पंतप्रधान आणि गृहमंत्री यांनी वेगवेगळ्या वेळी राष्ट्रपतींच्या भेटी घेतल्याने सत्ताकेंद्रात काही तरी गंभीर निर्णय प्रक्रियेला सुरुवात झाल्याचे संकेत मिळत आहेत.
