| सांगली समाचार वृत्त |
मुंबई - सोमवार दि. २८ जुलै २०२५
राज्याच्या राजकारणात स्थानिक स्वराज्य संस्थांच्या निवडणुकीपूर्वी घडामोडींना चांगलाच वेग आला आहे. याच पार्श्वभूमीवर शिवसेना (ठाकरे गट) प्रमुख उद्धव ठाकरे आणि मनसे अध्यक्ष राज ठाकरे यांच्यातील वाढती जवळीक आता सर्वांचं लक्ष वेधून घेत आहे. हिंदी सक्तीविरोधात काही दिवसांपूर्वी मुंबईत एकत्र मंचावर आलेले ठाकरे बंधू काल प्रत्यक्ष ‘मातोश्री’वर भेटले आणि या अनपेक्षित घडामोडीने राजकीय वर्तुळात चर्चांना उधाण आलं आहे.
२७ जुलै रोजी उद्धव ठाकरे यांच्या वाढदिवसानिमित्त राज ठाकरे यांनी मातोश्रीवर जाऊन त्यांची भेट घेतली. या सद्भावनापूर्ण क्षणात दोन्ही नेत्यांमध्ये जवळपास वीस मिनिटांची सुसंवादपूर्ण चर्चा झाली. अनेक वर्षांच्या अंतरानंतर राज ठाकरे यांचं मातोश्रीवर आगमन ही एक ऐतिहासिक आणि भावनिक घटना ठरली.
गेटवर स्वतः उद्धव ठाकरे राज ठाकरेंच्या स्वागतासाठी उभे होते, हे दृश्य कार्यकर्त्यांसाठी अत्यंत भावनिक होतं. राज ठाकरे यांच्या गाडीने मातोश्रीच्या अंगणात प्रवेश करताच उपस्थित शिवसैनिकांनी जल्लोष केला. त्यानंतर बाळासाहेब ठाकरे यांच्या प्रतिमेसमोर दोघांनी गळाभेट घेतली. हा क्षण अनेकांच्या नजरेत पाणी आणणारा होता.
राजकीय दृष्टिकोनातून महत्त्वपूर्ण ठरणाऱ्या या भेटीवेळी शिवसेना नेते संजय राऊत आणि मनसेचे बाळा नांदगावकर हेही उपस्थित होते. वरळीतील मेळाव्यानंतर ठाकरे बंधू पुन्हा एकत्र आल्याचं चित्र या भेटीद्वारे स्पष्ट झालं. राज ठाकरे यांनी गुलाबाचा पुष्पगुच्छ देत आपल्या शुभेच्छा व्यक्त केल्या, तर उद्धव ठाकरे यांनी “आज मला खूप आनंद झाला,” असे हृदयस्पर्शी शब्द उच्चारले.
राज ठाकरे यांचं अचानक आणि कोणतीही पूर्वसूचना न देता मातोश्रीवर येणं, ही एक मोठी घडामोड मानली जात आहे. ही भेट कितीही क्षणिक असली, तरी तिचं राजकीय पडसाद उमटवणं निश्चित आहे. काही काळाने राज ठाकरे पुन्हा आपल्या निवासस्थानी परतले, मात्र त्यांच्या या भेटीने आगामी काळात मनसे आणि ठाकरे गटात संभाव्य युतीची शक्यता अधिकच बलवत्तर केली आहे.
