| सांगली समाचार वृत्त |
हारुगिरी - मंगळवार दि. २२ जुलै २०२५
संस्कार, शिक्षण, आरोग्य, शेती आणि उद्योग या क्षेत्रांत प्रभावी कार्य करणारी दक्षिण भारत जैन सभा आपल्या त्रैवार्षिक अधिवेशनाच्या माध्यमातून सामाजिक बांधिलकीचे व्रत कायम राखते. या अधिवेशनात समाजाच्या उन्नतीचा मागोवा घेत भविष्यासाठी नव्या दिशा निश्चित केल्या जातात. याच अधिवेशनात कर्नाटकचे सार्वजनिक बांधकाम मंत्री सतिश जारकीहोळी यांनी जैन समाजाच्या सर्वांगीण प्रगतीसाठी कटीबद्ध असल्याचे सांगत, पुढील अधिवेशनात ‘जैन महामंडळ’ स्थापनेचे आश्वासन दिले.
हारुगिरी येथे पार पडलेल्या १०३ व्या त्रैवार्षिक अधिवेशनाच्या पुरस्कार वितरण समारंभात मंत्री जारकीहोळी बोलत होते. त्यांच्यासोबत कर्नाटकचे नियोजन व सांख्यिकी मंत्री डी. सुधाकर आणि आमदार डॉ. राजेंद्र पाटील यड्रावकर हे मंचावर प्रमुख उपस्थित होते.
या सोहळ्यात विविध क्षेत्रात उल्लेखनीय कामगिरी करणाऱ्या व्यक्तींना डॉ. कर्मवीर भाऊराव पाटील शिक्षण सेवा पुरस्कार, श्रावकरत्न जीवनगौरव पुरस्कार, समाजसेवा सन्मान, अशा मान्यतांनी गौरवण्यात आले. भिमगोंडा कर्नवाडी, सुरेश बहिरशेट (मुंबई) आणि विजय कोगनोळे यांचा यामध्ये प्रमुख उल्लेख करता येईल.
मंत्री डी. सुधाकर यांनी आपल्या भाषणात जैन समाजाच्या सामाजिक व आर्थिक स्थितीकडे लक्ष वेधले. राज्यात अल्पसंख्याक असलेला हा समाज अनेकदा अल्पभूधारक असल्याने, त्यांच्या हितासाठी स्वतंत्र महामंडळ आवश्यक असल्याचे मत त्यांनी मांडले. सरकार याकडे सकारात्मक दृष्टीने पाहत असल्याचेही त्यांनी स्पष्ट केले.
आमदार डॉ. यड्रावकर यांनी विराचार्य बाबासाहेब कुचनुरे यांच्या शिकवणीचा उल्लेख करत, समाज संघटीत करण्याच्या दिशेने प्रयत्नांची गरज व्यक्त केली. शिक्षणाने समाज घडला असला तरी संघटनाच्या अभावामुळे त्याचा लाभ व्यापक पातळीवर पोहोचलेला नाही, असे ते म्हणाले.
कार्यक्रमाची सुरुवात ‘णमोकार मंत्रा’ने झाली. सभेचे अध्यक्ष भालचंद्र पाटील यांनी सभेच्या कार्याचा सविस्तर आढावा मांडला. स्वागताध्यक्ष उत्तम पाटील (बोरगाव) यांनी आगत्यशील स्वागत केले, तर धुळगौडा पाटील यांनी प्रास्ताविक सादर केले. सूत्रसंचालनाची जबाबदारी प्रदिप मगदूम यांनी सांभाळली.
यावेळी अमोल पाटील (समाजसेवा), डॉ. सुरेखा नरदे (संशोधन व लेखन), सचिन कुसनाळे (मराठी साहित्य), बाहुबली पाटील (कनड साहित्य), महाबीर मल्टीपर्पज सहकारी संस्था, शांतिसागर क्रेडिट सोसायटी यांसह विविध संस्थांना आदर्श संस्था पुरस्कार देण्यात आला. इतर पुरस्कारप्राप्तांमध्ये सुधीर चौधरी, डॉ. प्रकाश पाटील, डॉ. अल्फा जैन-रोकडे, दयानंद मांगले, सागर चौगुले, सौ. विद्या सकळी, सौ. प्रीती पाटील, सौ. रुपाली शहा, सौ. निर्मला ऐतवडे, रावसाहेब पाटील, अभयकुमार भागाजे यांचा समावेश होता.
कार्यक्रमात विविध मान्यवरांची उपस्थिती लक्षणीय होती. माजी खासदार रमेश कत्ती, आमदार दुर्योधन ऐहोळे, माजी आमदार महंतेश कवटगीमठ, वीरकुमार पाटील, सुभाष जोशी, विवेकराव पाटील, जिन्नाप्पा अस्की, श्रीमंत पाटील, महेश कुमठोळी यांसह अनेक मान्यवर उपस्थित होते.
कार्यक्रमाचे आभार मुख्यमहामंत्री डॉ. अजित पाटील यांनी मानले.
