| सांगली समाचार वृत्त |
मुंबई - बुधवार दि. २३ जुलै २०२५
मुख्यमंत्री देवेंद्र फडणवीस यांच्या नेतृत्वगुणांमुळे महाराष्ट्राने अल्पावधीत झपाट्याने प्रगती केली, असे गौरवोद्गार राज्यपाल सी. पी. राधाकृष्णन यांनी व्यक्त केले. त्यांच्या वाढदिवसानिमित्त ‘महाराष्ट्र नायक’ या विशेष कॉफीटेबल बुकचे प्रकाशन राजभवन येथे करण्यात आले. हे पुस्तक जलसंपदा आणि आपत्ती व्यवस्थापन मंत्री गिरीश महाजन यांच्या संकल्पनेतून साकारले गेले असून, मुख्यमंत्री फडणवीस यांच्या कार्यकर्तृत्वाचा व्यापक आढावा यात घेण्यात आला आहे.
या प्रकाशन सोहळ्यास विधीमंडळाचे अध्यक्ष अ‍ॅड. राहुल नार्वेकर, कौशल्य विकास मंत्री मंगलप्रभात लोढा, तसेच अनेक मान्यवर आमदार आणि मंत्री उपस्थित होते.
राज्यपालांनी आपल्या भाषणात फडणवीस यांच्या शासनकाळातील काही महत्त्वपूर्ण योजनेचा उल्लेख केला. जलसुरक्षेच्या दिशेने 'जलयुक्त शिवार अभियान', समृद्धी महामार्गासारखे दृष्टीकोनात्मक प्रकल्प, आणि सेवा हक्क कायद्याच्या माध्यमातून सुरू झालेल्या ‘आपले सरकार’सारख्या तंत्रस्नेही उपक्रमांची त्यांनी प्रशंसा केली. तसेच, राज्यात थेट परकीय गुंतवणुकीत महाराष्ट्राने आघाडी घेतल्याचेही त्यांनी नमूद केले.
मुंबई मेट्रो, अटल सेतू, ग्रामीण सामाजिक परिवर्तन अभियान, आणि CSR अंतर्गत राबवले गेलेले उपक्रम हे सर्व महाराष्ट्राच्या सामाजिक व पायाभूत विकासाला चालना देणारे असल्याचे त्यांनी स्पष्ट केले. वाढवण बंदर, नवी मुंबई आंतरराष्ट्रीय विमानतळ आणि बुलेट ट्रेनसारखे महत्वाकांक्षी प्रकल्प लवकरच वास्तवात येतील, असेही त्यांनी सांगितले.
फडणवीस यांच्या आंतरराष्ट्रीय दौऱ्यांमुळे राज्यात तंत्रज्ञान व विकासासाठी जागतिक सहकार्य निर्माण झाले असून, दावोसच्या वर्ल्ड इकॉनॉमिक फोरममधील सहभागामुळे राज्याच्या प्रगतीस नवे क्षितिज लाभले. त्यातून झालेल्या सामंजस्य करारांमुळे रोजगारनिर्मितीचे मोठे दालन खुले झाले. गडचिरोलीचा 'स्टील डिस्ट्रिक्ट ऑफ इंडिया' म्हणून झालेला कायापालट हा त्यांच्या दृढ राजकीय इच्छाशक्तीचे प्रतीक असल्याचेही त्यांनी नमूद केले.‘माझी लाडकी बहिण’ या योजनेच्या माध्यमातून महिला सक्षमीकरणाला चालना मिळाली असून, कोट्यवधी महिलांना थेट आर्थिक मदत मिळाल्याने त्यांचा आत्मसन्मान वृद्धिंगत झाला आहे, असेही राज्यपालांनी अधोरेखित केले.
विधानसभा अध्यक्ष अ‍ॅड. राहुल नार्वेकर यांनी 'महाराष्ट्र नायक' हे पुस्तक केवळ फडणवीस यांच्या कार्याचा दस्तऐवज नसून, त्यांच्याशी संबंधित अनुभव, प्रेरणादायी क्षण व दूरदृष्टी या सर्वांचे प्रतिबिंब आहे, असे मत व्यक्त केले. तर, मंत्री गिरीश महाजन यांनी त्यांना “महाराष्ट्राच्या नवपरिवर्तनाचा नायक” म्हणून गौरविले. त्यांच्या मते, फडणवीस हे संयम, नेतृत्वकौशल्य आणि विकासदृष्टी यांचा संगम आहेत.
या पुस्तकात अनेक मान्यवरांच्या मुलाखतींचाही समावेश असून, त्यात नितीन गडकरी, शरद पवार, उद्धव ठाकरे, अजित पवार, एकनाथ शिंदे, रवींद्र चव्हाण, चंद्रशेखर बावनकुळे यांसह अनेक दिग्गजांचे अनुभव मांडण्यात आले आहेत. तसेच, अभिनेत्री अमृता फडणवीस, अभिनेता आमिर खान आणि इतर विचारवंतांचाही समावेश आहे.
