फोटो सौजन्य : वॉटसॲप वरुन
| सांगली समाचार वृत्त |
सांगली - बुधवार दि. २ जुलै २०२५
शेती वाचवण्यासाठी जर प्रसंगी रक्त सांडावं लागलं, तरीही चालेल, असा ठाम निर्धार खा. विशाल पाटील यांनी व्यक्त केला आहे. शासनाच्या शक्तिपीठ महामार्ग प्रकल्पाविरोधात आता लढा निर्णायक टप्प्यावर पोहोचला असून, शेतकऱ्यांनी रस्त्यावर उतरून जाहीर इशारा दिला आहे.
जोरदार झालेल्या पावसातही शेकडो शेतकऱ्यांनी महिलांसह महामार्गाच्या मार्गावर रास्ता रोको करत आपला आक्रोश नोंदवला. जैन वडा चौकात झालेल्या आंदोलनात "शेती आमच्या हक्काची", "या सरकारचे काय करायचे – खाली मुंडी वर पाय!" अशा घोषणांनी परिसर दणाणून गेला.
या आंदोलनाचे नेतृत्व खासदार विशाल पाटील, स्वाभिमानी शेतकरी संघटनेचे जिल्हाध्यक्ष महेश खराडे आणि सर्वपक्षीय कृती समितीचे पदाधिकारी यांनी केले. त्यांच्या म्हणण्यानुसार, हा महामार्ग विकासाच्या नावाखाली शेतकऱ्यांच्या उध्वस्ततेचा कट आहे. कुणाच्याही मागणीविना, फक्त ठरावीक मंडळींच्या फायद्यासाठी हा प्रकल्प रेटून लावला जात आहे.
विशेष म्हणजे कृषी दिनीच हे आंदोलन झाले, हे शेतकऱ्यांच्या व्यथेला अधिक गहिरेपण देणारे ठरले. या दिवशी शेतकऱ्यांना त्यांच्या हक्कासाठी रस्त्यावर उतरावे लागणे ही शासनाच्या धोरणांची विफलता दर्शवणारी शोकांतिका आहे, असे महेश खराडे यांनी सांगितले.प्रकल्पामुळे महापुराचा धोका वाढण्याची शक्यता असून, यासंबंधी कोणतीही शास्त्रशुद्ध अभ्यासमालिका प्रशासनाकडून मांडलेली नाही. त्याचप्रमाणे, या महामार्गासाठी कोट्यवधींचं कर्ज उचलून राज्याला अधिक कर्जबाजारी करण्यात येणार आहे – असा आरोप शेतकऱ्यांकडून करण्यात आला.
आंदोलनादरम्यान काही प्रमुख नेत्यांना अटक झाली होती, मात्र नंतर त्यांची सुटका करण्यात आली. दरम्यान, आंदोलकांनी स्पष्टपणे सांगितले की आम्ही विकासविरोधी नाही, पण अविचारी प्रकल्पांचा आणि शेतकऱ्यांच्या उध्वस्ततेचा नक्कीच विरोध करतो.
"ही लढाई रस्त्यावरच नव्हे, तर शेतातही लढू!" असा निर्धार करत शेतकऱ्यांनी सरकारला थेट इशारा दिला आहे – शक्तिपीठ महामार्ग कुठल्याही परिस्थितीत उभा राहू देणार नाही, कारण आमचं जीवन आणि जमिनीत आमचं भविष्य दडलं आहे.
