| सांगली समाचार वृत्त |
मुंबई - सोमवार दि. ७ जुलै २०२५
महाराष्ट्राच्या गौरवशाली परंपरेत ज्यांनी विचार, परिश्रम आणि समर्पणातून समाज घडवला – अशा संत, राजे आणि समाजसुधारकांच्या वारशाची सखोल चर्चा करणारी विशेष पॉडकास्ट मालिका ‘महाराष्ट्रधर्म’ आजपासून सुरू झाली आहे. या मालिकेचा शुभारंभ आषाढी एकादशीच्या पवित्र दिवशी मुख्यमंत्री देवेंद्र फडणवीस यांच्या सखोल विचारमंथनातून झाला.
या मालिकेची पहिली पर्व ‘महाराष्ट्रधर्म – पायाभरणी आणि उभारणी’ या विषयावर आधारित असून, सुप्रसिद्ध विचारवंत व तुकोबारायांच्या वंशज डॉ. सदानंद मोरे यांनी मुख्यमंत्र्यांची अत्यंत अभ्यासपूर्ण आणि अर्थपूर्ण मुलाखत घेतली.
मुख्यमंत्री फडणवीस यांनी आपल्या मनोगतातून स्पष्ट केले की, आपण शिवरायांचे, ज्ञानेश्वर माऊलींचे, सावित्रीमाई आणि बाबासाहेब आंबेडकरांचे थेट वंशज नसले, तरी त्यांच्या विचारसरणीचा वारसा जपण्याची जबाबदारी आपल्यावर आहे. ‘महाराष्ट्रधर्म’ म्हणजे केवळ ऐतिहासिक स्मरण नव्हे, तर एक जीवनमूल्यांची मार्गदर्शक संहिता आहे. विवेक, सेवाभाव आणि शौर्य या त्रिसूत्रीवर उभा असलेला हा विचार सतत प्रगतिशील राहिल्याचे त्यांनी सांगितले.
या पॉडकास्टमध्ये रामायण, महाभारत, भगवान बुद्ध, भक्ती चळवळ, संत परंपरा, आणि महाराष्ट्राच्या आध्यात्मिक जडणघडणीपासून ते आधुनिक सामाजिक आणि राजकीय क्रांतीपर्यंत अनेक पैलूंवर सखोल भाष्य करण्यात आले. विशेष म्हणजे या माध्यमातून नव्या पिढीला महाराष्ट्राच्या वैचारिक परंपरेची नव्याने ओळख करून देण्याचा प्रयत्नही त्यांनी केला.
पूर्वी ‘मी मुख्यमंत्री बोलतोय’ या टीव्ही शोद्वारे जनतेशी थेट संवाद साधणाऱ्या मुख्यमंत्र्यांनी आता पॉडकास्टच्या नवमाध्यमातून पुन्हा एकदा व्यापक जनसंवादाचा नवा अध्याय सुरू केला आहे.
या पहिल्याच भागाला श्रोत्यांकडून उत्स्फूर्त प्रतिसाद मिळाल्याचे मुख्यमंत्री फडणवीस यांनी नम्रपणे नमूद केले. महाराष्ट्रधर्माची साखळी ज्ञानेश्वरांच्या ओव्यांपासून, शिवरायांच्या तलवारीपर्यंत, फुल्यांच्या लढ्यांपासून बाबासाहेब आंबेडकरांच्या दूरदृष्टीपर्यंत अखंड चालत आलेली आहे आणि ती आजही चालूच आहे, हे त्यांनी ठामपणे अधोरेखित केले.महाराष्ट्र धर्म हा फक्त इतिहास नव्हे, तर वर्तमानातील जागर आहे. महात्मा फुले, सावित्रीबाई, आगरकर, गाडगेबाबा, भाऊराव पाटील, टिळक, तुकडोजी महाराज या सर्वांनी आपल्या विचारांनी महाराष्ट्राला वैचारिक बळ दिले. त्यांनी कर्मकांडांना प्रश्न विचारले, समाजातील विषमता दूर करण्यासाठी संघर्ष केला, शिक्षण आणि स्वच्छतेच्या माध्यमातून समाज प्रबोधन केले.
याच अनुषंगाने मुख्यमंत्री फडणवीस यांनी रिद्धपूर येथील मराठी भाषा विद्यापीठाच्या स्थापनेची माहितीही दिली. गोबिंदप्रभूंच्या स्मृतीशी जोडलेल्या या स्थळी महाराष्ट्र शासनाने भाषेच्या समृद्धतेसाठी एक महत्त्वपूर्ण पाऊल उचलले असून, विद्यापीठाचे कामकाज नुकतेच सुरू झाले आहे.
‘महाराष्ट्रधर्म’ ही मालिका महाराष्ट्राच्या इतिहासाची नव्या पिढीशी असलेली सजीव नाळ आहे. ही मालिका केवळ ऐकण्यासाठी नाही, तर विचार करण्यासाठी, आत्मचिंतनासाठी आणि समाजदृष्टिकोन समृद्ध करण्यासाठी आहे.
