| सांगली समाचार वृत्त |
मुंबई - सोमवार दि. १४ जुलै २०२५
देशातील ख्यातनाम सरकारी वकील आणि अनेक खटल्यांत कठोर भूमिका घेणारे उज्ज्वल निकम यांना अखेर संसदीय राजकारणात प्रवेश मिळाला आहे. नुकत्याच जाहीर झालेल्या राष्ट्रपती नियुक्त सदस्यांच्या यादीत त्यांचा समावेश करण्यात आला असून, त्यांची राज्यसभेवर नामनिर्देशित सदस्य म्हणून नियुक्ती करण्यात आली आहे. याआधी लोकसभा निवडणुकीत त्यांना पराभवाचा सामना करावा लागला होता, मात्र आता त्यांची खासदार होण्याची आकांक्षा पूर्ण झाली आहे.
राष्ट्रपती द्रौपदी मुर्मू यांनी राज्यसभेतील चार नामनिर्देशित जागांसाठी विविध क्षेत्रांतून उल्लेखनीय कार्य करणाऱ्या व्यक्तींना निवडले आहे. यामध्ये उज्ज्वल निकम यांच्यासह माजी परराष्ट्र सचिव हर्षवर्धन श्रृंगला, इतिहासकार व लेखक डॉ. मिनाक्षी जैन आणि केरळ राज्यातील सामाजिक कार्यकर्ते सी. सदानंदन मास्टर यांचाही समावेश आहे. या चार नव्या नियुक्त्यांची अधिकृत अधिसूचना केंद्र सरकारतर्फे जारी करण्यात आली आहे.उज्ज्वल निकम यांनी त्यांच्या कारकीर्दीत आतंकवाद, गुन्हेगारी आणि राष्ट्रविरोधी कृत्यांवर कठोर भूमिका घेत अनेक खटल्यांत यश मिळवलं आहे. 1993 मुंबई साखळी बॉम्बस्फोट, प्रफुल्ल भोसले खूनप्रकरण, अबू सालेम आणि अजमल कसाबविरोधातील खटले यांसारख्या अनेक उच्चप्रोफाईल प्रकरणांमध्ये त्यांनी सरकारी वकील म्हणून काम पाहिले. त्यांच्या काटेकोर आणि अचूक युक्तिवादामुळे अनेक आरोपींना कठोर शिक्षा सुनावण्यात आली.
राज्यसभेतील नामनिर्देशित जागा ही अशी असते की जिथे विविध क्षेत्रांतील तज्ज्ञांना संसदेत थेट सहभाग घेण्याची संधी मिळते. या माध्यमातून त्यांचा अनुभव, विचार आणि कार्यक्षमता राष्ट्रीय धोरणनिर्मितीत उपयोगी पडते. उज्ज्वल निकम यांची नियुक्ती ही न्यायव्यवस्था आणि कायदा क्षेत्रातील योगदानाची अधिकृत पावती मानली जात आहे.
या नियुक्तीसोबतच, भारताच्या परराष्ट्र धोरणात मोलाचे योगदान देणारे हर्षवर्धन श्रृंगला, सांस्कृतिक आणि ऐतिहासिक संशोधनात उल्लेखनीय कार्य करणाऱ्या डॉ. मिनाक्षी जैन आणि समाजसेवेत आयुष्य खर्च करणारे सी. सदानंदन मास्टर हे देखील आता राज्यसभेत आपली भूमिका बजावणार आहेत.
