| सांगली समाचार वृत्त |
सांगली - रविवार दि. १३ जुलै २०२५
सांगली जिल्ह्यातील इरळी (ता. कवठेमहांकाळ) येथे कार्यरत असलेला एक आंतरराष्ट्रीय अमली पदार्थ उत्पादन केंद्र अखेर उध्वस्त करण्यात आले असून, या प्रकरणात दुबईतून कार्यरत असलेला कुख्यात तस्कर मुस्तफा मोहम्मद कुब्बावाला याला भारतात आणण्यात पोलिसांना यश आले आहे. इंटरपोलच्या ‘रेड कॉर्नर’ नोटीसवर असलेल्या या प्रमुख आरोपीचा ठावठिकाणा शोधून त्याचे प्रत्यार्पण करण्यात आले.
मुंबईत एमडी ड्रग्जची मागणी झपाट्याने वाढल्याने अशा तस्करीमागे असलेल्या टोळ्यांचा शोध घेण्यासाठी विशेष मोहिम राबवली जात होती. याच मोहिमेअंतर्गत, फेब्रुवारी 2024 मध्ये कुर्ला परिसरात ड्रग्ज डिलिव्हरीबाबत मिळालेल्या माहितीच्या आधारे, पोलिसांनी परवीन बानो गुलाम शेख या महिलेस ताब्यात घेतले. तिच्याकडून 641 ग्रॅम एमडी ड्रग्ज, सुमारे 12 लाख रुपये रोख रक्कम आणि सोन्याचे दागिने जप्त करण्यात आले.
पुढील तपासात ‘डॅब्स’ या टोपणनावाने ओळखल्या जाणाऱ्या साजिद मोहम्मद आसिफ शेख याला अटक करण्यात आली. त्याच्या निवासस्थानी पोलिसांनी सुमारे 3 किलो अमली पदार्थ आणि लाखोंच्या रोख रकमेचा साठा उघड केला.
या चौकशीतून दुबईस्थित तस्करांच्या भारतातील जाळ्याचा पर्दाफाश झाला. त्यांच्या मार्गदर्शनाखाली सांगली परिसरात एमडी ड्रग्जचा कारखाना उभारण्यात आला होता. तयार झालेल्या पदार्थाची विक्री मुंबई व गुजरातमधील नेटवर्कच्या माध्यमातून केली जात होती. या जाळ्यातून सुरतहून अटक केलेल्या दोन तस्करांच्या चौकशीतून आणखी काही आरोपींचा शोध लागला.
त्यानंतर सांगलीतील कारखान्यावर धाड टाकून 122.5 किलो एमडी ड्रग्जसह 245 कोटींचा साठा हस्तगत करण्यात आला. तपासादरम्यान मुस्तफा कुब्बावाला आणि ताहेर सलीम डोला हे दोघे मुख्य सूत्रधार असल्याचे समोर आले. पोलिसांनी लुकआउट नोटीस जारी करून, अखेर जून 2025 मध्ये सलीम डोलाला अटक केली, तर कुब्बावालाला युएईहून प्रत्यार्पित करून भारतात आणण्यात आले.
मुस्तफाच्या चौकशीतून आणखी धक्कादायक माहिती उघड होण्याची शक्यता असून, तो सध्या मुंबई गुन्हे शाखेच्या ताब्यात आहे. या संपूर्ण प्रकरणात आतापर्यंत एकूण 12 आरोपींना अटक करण्यात आली असून, पोलिसांनी 256 कोटींहून अधिक किमतीचा एकूण मुद्देमाल हस्तगत केला आहे. यात 126 किलो 141 ग्रॅम एमडी ड्रग्ज, 3 कोटी 64 लाखांहून अधिक रोकड, सोन्याचे दागिने, एक स्कोडा कार, बाईक, व अमली पदार्थ निर्मितीचे साहित्य यांचा समावेश आहे.
सांगलीतील तीन प्रमुख कारवाया
2024 मध्ये कुपवाड येथे पुण्यात तयार करण्यात आलेल्या 100 किलो एमडी ड्रग्जचा साठा जप्त करण्यात आला. ही कारवाई स्थानिक पोलीस ठाण्याच्या अगदी जवळ झाली होती.
27 जानेवारी 2026 रोजी विटा येथे छापा टाकून 14 किलो एमडी ड्रग्ज जप्त केले गेले, ज्याची किंमत सुमारे 30 कोटी होती. त्या वेळी सहा जणांना अटक करण्यात आली असून, सर्व आरोपी सध्या कळंबा कारागृहात आहेत.
इरळी गावात करण्यात आलेल्या मोठ्या कारवाईत 126.141 किलो मेफेड्रोन जप्त करण्यात आला होता, ज्याची आंतरराष्ट्रीय बाजारपेठेतील किंमत सुमारे 252 कोटी रुपये इतकी आहे. ही कारवाई 2024 मध्ये मुंबई पोलिसांच्या युनिट सातकडून पार पडली होती.
