राम मंदिर प्रसाद घोटाळा: श्रद्धेचा गैरफायदा घेत १० कोटींचा ऑनलाईन गंडा

| सांगली समाचार वृत्त |

अयोध्या - शनिवार दि. ७ जून २०२५

श्रद्धा आणि आस्था यांचा गैरफायदा घेत लोकांची फसवणूक होण्याचे प्रकार आपण अनेकदा पाहिले आहेत. अगदी अयोध्येतील रामलल्लाच्या प्रतिष्ठापना सोहळ्याच्याही निमित्ताने एक धक्कादायक आर्थिक घोटाळा उघडकीस आला आहे. भाविकांच्या श्रद्धेचा वापर करून सुमारे १० कोटी रुपयांचा फसवणूक प्रकरण उघडकीस आलं आहे.

फसवणुकीची शक्कल काय होती?

२२ जानेवारी २०२४ रोजी रामलल्लाच्या मूर्तीची प्रतिष्ठापना मोठ्या भक्तिभावात पार पडली. याच काळात एका व्यक्तीने स्वतःला अमेरिकेतील नामांकित विद्यापीठाचा प्राध्यापक असल्याचं भासवत एक बनावट वेबसाइट तयार केली. या khadiorganic.com नावाच्या वेबसाईटवरून “राम मंदिराचा प्रसाद घरी मिळवा” अशी मोहक ऑफर दिली गेली. भारतातील भाविकांकडून ५१ रुपये आणि परदेशातील लोकांकडून ११ डॉलर शुल्क आकारून लाखो लोकांकडून पैसे उकळण्यात आले.

कोण आहे या फसवणुकीमागे?

या प्रकरणाचा मास्टरमाइंड आशिष सिंह हा उत्तर प्रदेशातील गाझियाबादमधील रहिवासी असून सध्या अमेरिकेत वास्तव्यास आहे. त्याने डिसेंबर २०२३ ते जानेवारी २०२४ या कालावधीत तब्बल ६.३० लाख भाविकांकडून ऑनलाईन ऑर्डरच्या माध्यमातून पैसे जमा केले.

प्रसादाबरोबरच मंदिराची प्रतिकृती आणि स्मारक नाण्यांचंही आमिष दाखवण्यात आलं. पेमेंटसाठी येस बँक, पेटीएम, फोनपे, मोबिक्विक आणि आयडीएफसीसारख्या पेमेंट गेटवेचा वापर करण्यात आला. या सगळ्या व्यवहारांतून १०.४९ कोटी रुपये जमा करण्यात आले, ज्यापैकी ३.८५ कोटी रुपये केवळ प्रसाद ऑर्डरवरून मिळवले गेले.

राम मंदिर ट्रस्टनं घेतली दखल

राम जन्मभूमी तीर्थक्षेत्र ट्रस्टला याबाबत संशय आल्याने त्यांनी अयोध्येच्या सायबर पोलिसांकडे तक्रार दाखल केली. तपास सुरू झाल्यावर सायबर गुन्हे शाखेने या ऑनलाईन घोटाळ्याचा पर्दाफाश केला. पोलिसांनी IPC कलम 420, IT अ‍ॅक्ट कलम 66D, आणि पासपोर्ट कायद्यानुसार गुन्हा नोंदवला. आशिष सिंहला भारतात येताना अयोध्येमध्येच अटक करण्यात आली. त्याच्याकडून अनेक इलेक्ट्रॉनिक उपकरणं, ओळखीची कागदपत्रं आणि रोख रक्कम हस्तगत करण्यात आली आहे.

लोकांचे पैसे परत मिळवण्यासाठी प्रयत्न

या फसवणुकीत हजारो भाविकांना गंडा घालण्यात आला होता. पोलिसांच्या सायबर रिकव्हरी टीमने आतापर्यंत ३.७२ लाख लोकांचे २.१५ कोटी रुपये परत केले आहेत, तर उर्वरित १.७० कोटींची वसुली अद्याप बाकी आहे. श्रद्धेचं भांडवल करून होणाऱ्या फसवणुकींपासून सावध राहणं आणि अधिकृत स्रोतांकडूनच माहिती घेणं ही काळाची गरज बनली आहे.