| सांगली समाचार वृत्त |
मुंबई - गुरुवार दि. १९ जून २०२५
राज्यात सत्तेचा लगाम ‘महायुती’कडे असला, तरी त्यामध्ये अंतर्गत असंतोषाचे सूर चिघळू लागले आहेत. महायुतीतील प्रमुख घटक असलेल्या भाजपकडून उपमुख्यमंत्री एकनाथ शिंदे यांच्या पक्ष विस्ताराच्या धोरणावर नाराजी व्यक्त केली जात आहे. सत्तेचा लाभ एकतर्फी घेतला जात असल्याचा भाजप नेत्यांचा आरोप आहे.
नाशिकमध्ये नुकतेच माजी मंत्री बबन घोलप, माजी महापौर अशोक मुर्तडक, नयना घोलप यांच्यासह सात माजी नगरसेवकांनी भाजपमध्ये प्रवेश केला. मात्र, यातील सुधाकर बडगुजर यांच्या प्रवेशावरून पक्षातच वादळ उठले आहे. काही नेत्यांनी त्यांच्या प्रवेशावर जाहीर नाराजी व्यक्त केली आहे.
दरम्यान, या वादाचा केंद्रबिंदू विकास निधीच्या वाटपावरून आहे. शिवसेना (शिंदे गट)मध्ये प्रवेश करणाऱ्या नेत्यांना उपमुख्यमंत्री एकनाथ शिंदे यांच्याकडून थेट विकास निधी दिला जातो. त्यांच्या विशेष अधिकाराचा वापर करून शिंदे हे आपला पक्ष वाढवण्याचा प्रयत्न करीत आहेत, अशी भाजपतील नाराजीची धारणा आहे.
यामुळेच अनेक माजी नगरसेवक शिवसेना (ठाकरे गट) सोडून शिंदे गटात सामील होत आहेत. मिळणाऱ्या निधीच्या आशेनेच हा ओघ सुरू असल्याचे बोलले जाते. तर दुसरीकडे, भाजपमध्ये प्रवेश करणाऱ्यांना मात्र अशा स्वरूपाचा लाभ मिळत नसल्याने, नव्याने आलेले आणि स्थानिक पदाधिकारी दोघेही नाराजी व्यक्त करत आहेत.
यासंदर्भात भाजपचे नाशिक शहराध्यक्ष सुनील केदार यांनी उघडपणे आपली भूमिका मांडली आहे. पक्षात येणाऱ्या नव्या चेहऱ्यांनाही विकास निधी मिळायला हवा, अशी त्यांची ठाम मागणी आहे. भाजपचे वरिष्ठ नेते यावर गांभीर्याने विचार करतील, अशी अपेक्षा त्यांनी व्यक्त केली.
महापालिका आणि स्थानिक स्वराज्य संस्थांच्या निवडणुका जवळ येत असताना, सत्ता असलेल्या दोन्ही पक्षांनी आपापल्या गोटात पक्ष वाढीचे प्रयत्न सुरू केले आहेत. यासाठी सर्व प्रकारची राजकीय साधने वापरली जात आहेत. मात्र, यातूनच महायुतीमध्ये असलेल्या असंतोषाचे सावट अधोरेखित होत आहे. राजकीय समीकरणांपेक्षा निधीच मोठा निर्णयकारक ठरत असल्याचे यावरून स्पष्ट होत आहे.
