| सांगली समाचार वृत्त |
सांगली - शनिवार दि. २८ जून २०२५
समाजाचे ऋण फेडण्याची अनेक मार्गं असतात, पण काही व्यक्तिमत्वं ती वाट सरळ राजकारणात शोधतात — फक्त सत्तेसाठी नव्हे, तर व्यापक समाजहितासाठी. अशाच समर्पित कार्यातून पुढे आलेलं नाव म्हणजे श्री. रावसाहेब जिनगोंडा पाटील.
औद्योगिक, शैक्षणिक, सहकारी, अल्पसंख्याक व उद्योजक क्षेत्रात सातत्याने कार्यरत असलेल्या रावसाहेब जिनगोंडा पाटील यांच्या नेतृत्वाला भारतीय जनता पक्षाने आता अधिक व्यापक व्यासपीठ दिलं आहे. भाजपाच्या जैन प्रकोष्ठाच्या महाराष्ट्र राज्य उपाध्यक्षपदी त्यांची नुकतीच नियुक्ती जाहीर झाली असून, या घडामोडीने जैन समाजात आणि राज्यभरात सकारात्मक प्रतिक्रिया उमटल्या आहेत.
दोन दशकांहून अधिक काळ सामाजिक उपक्रमांतून सक्रिय असलेल्या पाटील यांनी अल्पसंख्याक आयोगाचे सदस्य म्हणून कार्य करताना अनेक महत्त्वाचे निर्णय घेतले आहेत. सध्या ते अल्पसंख्याक आर्थिक विकास महामंडळाचे सदस्य म्हणून धोरणात्मक पातळीवर कार्यरत आहेत.
शैक्षणिक क्षेत्रातील त्यांची कामगिरीही उल्लेखनीय आहे. विविध संस्था, महाविद्यालये आणि अकॅडम्यांमधून त्यांनी विद्यार्थ्यांना दर्जेदार शिक्षण उपलब्ध करून दिलं असून, शिक्षण संस्था महामंडळाचे कोषाध्यक्ष म्हणून त्यांनी कारभारात पारदर्शकता आणि गुणवत्ता जपली आहे.
दक्षिण भारत जैन सभेचे नेतृत्व करताना त्यांनी समाजाच्या सामाजिक व सांस्कृतिक उन्नतीसाठी विविध उपक्रम यशस्वीपणे राबवले. केवळ जैन समाजापुरताच मर्यादित न राहता, त्यांनी सर्व समाजासाठी समर्पित वृत्तीने कार्य केलं आहे.
औषध उद्योगातील त्यांचा अनुभव आणि व्यावसायिक संस्थांची उभारणी यातून त्यांचा दूरदृष्टीचा दृष्टिकोन अधोरेखित होतो. सांगली जिल्ह्यातील केमिस्ट अँड ड्रगिस्ट असोसिएशनचे ते संस्थापक संचालक आहेत, तसेच फार्मसी कॉलेज स्थापण्यातही त्यांचा मोलाचा सहभाग आहे.
सहकार क्षेत्रात कर्मवीर नागरी सहकारी पतसंस्थेच्या माध्यमातून त्यांनी ग्रामीण व नागरी भागांतील नागरिकांना आर्थिक सक्षमता मिळवून दिली. हजारो ठेवीदारांचा विश्वास जिंकत त्यांनी सहकाराला बळकटी दिली आहे.
राजकीय दृष्टिकोनातून, श्री. पाटील हे भाजपाच्या विचारधारेशी घट्ट बांधले गेले आहेत. गोव्याचे मुख्यमंत्री प्रमोद सावंत यांच्यासह झालेल्या चर्चेतून त्यांनी निवडणूक व्यवस्थापन, प्रचार योजना आणि कार्यकर्त्यांचे बळ वाढवण्याचे महत्त्वाचे निर्णय घेतले होते.
विचारांची मांडणी आणि कार्याची व्यापकता
भारतीय जनता पक्षाच्या विकासाभिमुख धोरणांशी समरस होत रावसाहेब पाटील यांनी आता आपली सामाजिक वाटचाल अधिक संघटित पद्धतीने पुढे नेण्याचा निर्धार केला आहे. अल्पसंख्यांक, उद्योजक, शेतकरी, विद्यार्थी, सहकारी संस्था अशा विविध घटकांच्या जीवनात सुधारणा घडवून आणणं हे त्यांचं मुख्य उद्दिष्ट राहणार आहे.
या नव्या भूमिकेमुळे सामाजिक कार्याला नवी दिशा मिळेल आणि योजनांच्या प्रभावी अंमलबजावणीत त्यांचा अनुभव मोलाचा ठरेल, यात शंका नाही. राजकारण ही केवळ सत्ता मिळवण्याची वाट नसून, समाजाच्या भल्यासाठी झटण्याचं साधन ठरू शकतं, हे त्यांनी आपल्या कार्यातून सतत सिद्ध केलं आहे.
