| सांगली समाचार वृत्त |
सांगली - रविवार दि. २२ जून २०२५
मार्केट यार्ड परिसरातील रिलायन्स ज्वेल्सवर ४ जून २०२३ रोजी भरदुपारी झालेल्या बहुचर्चित दरोड्याप्रकरणी फरार असलेल्या प्रिन्सकुमार शिवनाथ सिंग (वय २७, तानापुर, दिलावरपूर, जि. वैशाली, बिहार) याला विश्रामबाग पोलिसांनी अखेर अटक केली आहे. डेहराडून कारागृहातून त्याचा ताबा घेऊन ही कारवाई करण्यात आली.
प्रारंभीच्या तपासात या दरोड्यात प्रिन्सकुमारचा दुचाकी पुरवठ्याच्या माध्यमातून सहभाग असल्याचे निष्पन्न झाले आहे. आतापर्यंत पोलिसांनी या गुन्ह्यातील सहा संशयितांना ताब्यात घेतले असले, तरी दरोड्यात वापरलेला दागिन्यांचा मुद्देमाल अजूनही सापडलेला नाही. पोलिस निरीक्षक सुधीर भालेराव यांनी सांगितले की, अटक करण्यात आलेल्या प्रिन्सकुमारकडून सखोल चौकशी केली जाणार आहे.
दिवसाढवळ्या ६ कोटी ४४ लाखांची लूट
सांगली शहरातील अत्यंत वर्दळीच्या मार्केट यार्ड परिसरात, रिलायन्स ज्वेल्स या नामवंत दागिने पेढीवर भरदुपारी सशस्त्र दरोडा टाकण्यात आला होता. सुमारे १५ ते २० मिनिटांत दरोडेखोरांनी कर्मचाऱ्यांचे हातपाय बांधून, पोलीस असल्याची बतावणी करत, तब्बल ६ कोटी ४४ लाख रुपयांचे दागिने लंपास केले होते. घटनास्थळी एका ग्राहकाच्या दिशेने गोळीबारदेखील झाला होता, मात्र सुदैवाने तो बचावला.
या घटनेनंतर संपूर्ण राज्यात खळबळ उडाली होती. पोलिस दलही तत्काळ हरकत घेत सक्रिय झाले. मुख्य सूत्रधार सुबोध सिंग याच्यापासून तपासाची चक्रे फिरू लागली.
डेहराडूनमधील गुन्ह्यामुळे आले ताब्यात
सांगलीतील दरोड्यानंतर संबंधित टोळीने डेहराडूनमधील रिलायन्स ज्वेल्सवरही हल्ला चढवून लाखोंचे दागिने चोरले. या प्रकरणात प्रिन्सकुमारला तेथील पोलिसांनी अटक केली होती. त्यानंतर सांगली पोलिसांनी अधिकृत पत्रव्यवहार करून ट्रांझिट रिमांडवर त्याला सांगलीत आणले. आज त्याला विश्रामबाग पोलिसांनी अधिकृत ताब्यात घेतले असून न्यायालयात हजर करण्यात येणार आहे.
घटनास्थळाची पाहणी व दुचाकीचा तपास
अटकेनंतर पोलिसांनी प्रिन्सकुमारला दरोड्याच्या ठिकाणी नेऊन पंचनामा केला. त्यावेळी त्याने वापरलेली दुचाकी कर्नाटकातून आणल्याची कबुली दिली. सदर दुचाकी लातूरमधून घेतल्याचे आणि ती महात्मा गांधी चौकी पोलिस ठाण्याच्या हद्दीतून जप्त झाल्याची माहिती देण्यात आली.
अटक केलेले व फरार संशयित
या गुन्ह्यात आतापर्यंत अटक झालेले प्रमुख संशयित:
सुबोध सिंग ईश्वरप्रसाद सिंग (चिश्तीपूर, नालंदा, बिहार)
महंमद शमशाद महंमद मुख्तार (चेरिया, बेगुसराय, बिहार)
अंकुरप्रताप रामकुमार सिंग (नौबातपूर, पाटणा, बिहार)
शशांक उर्फ सोनू धनंजयकुमार सिंग (सदरसा, बिहार)
एसपी ऊर्फ अनिल सोहनी (मुंद्रा, गुजरात)
आणि आता प्रिन्सकुमार शिवनाथ सिंग
फरार संशयितांमध्ये गणेश उध्दव बद्रेवार (हैद्राबाद), प्रताप अशोकसिंग राणा (वैशाली, बिहार) आणि कार्तिक नंदलाल मुजुमदार (हुगळी, पश्चिम बंगाल) यांचा समावेश असून, त्यांच्या शोधासाठी तपास यंत्रणा कार्यरत आहेत.
