फोटो सौजन्य : फेसबुक वॉलवरुन
| सांगली समाचार वृत्त |
मुंबई - शुक्रवार दि. २० जून २०२५
मुंबई महापालिकेच्या आगामी निवडणुकीच्या पार्श्वभूमीवर शिवसेना (ठाकरे गट) आणि महाराष्ट्र नवनिर्माण सेनेमधील संभाव्य युतीवरून चर्चांना उधाण आले आहे. नुकत्याच पार पडलेल्या शिवसेनेच्या ५९ व्या वर्धापनदिन मेळाव्यात पक्षप्रमुख उद्धव ठाकरे यांनी याबाबत स्पष्ट संकेत दिले. "महाराष्ट्राच्या मनात जे आहे, तेच करण्यास मी कटिबद्ध आहे," अशा शब्दांत त्यांनी मनसेसोबतच्या जवळीकतेला दुजोरा दिला.
मुंबईतील षण्मुखानंद सभागृहात झालेल्या या मेळाव्यात उद्धव ठाकरे यांनी भाजप, पंतप्रधान नरेंद्र मोदी, केंद्रीय गृहमंत्री अमित शाह आणि मुख्यमंत्री एकनाथ शिंदे यांच्यावर जोरदार टीकास्त्र सोडलं. मराठी मतांचे एकीकरण रोखण्यासाठी सुरू असलेल्या हालचालींवरही त्यांनी निशाणा साधला.
"मुंबईत मराठी माणूस पुन्हा एकत्र आला, तर काहींची सत्ता आणि हुकूमशाही संपेल," असा इशाराही त्यांनी दिला. त्यांनी असा आरोप केला की, काहीजण हॉटेलांमध्ये गुप्त भेटीगाठी घेत आहेत, फक्त मराठी समाजात फूट पाडण्यासाठी. पण त्यांनीही स्पष्ट शब्दांत सांगितलं, "तुम्ही शिवसेनाप्रमुखांचा वारसा पुसण्याचा प्रयत्न केलात, तर महाराष्ट्रात तुमचं अस्तित्वही संपवीन."
पुढे बोलताना त्यांनी मराठी अस्मितेचा मुद्दा पुन्हा अधोरेखित केला. "ही लढाई केवळ माझी नाही. १९६० साली ज्या मराठी रक्ताने मुंबई मिळवली, त्याच रक्ताची आठवण ठेवत ही लढाई लढतोय. आम्ही उभे राहिलो तरच मुंबई वाचेल," अशी ठाम भूमिका त्यांनी मांडली."एकत्र येणार नाही म्हणणाऱ्यांना आम्ही विचारतो – तुम्हाला काय करायचं आहे? आमचं आम्ही बघू. आणि महाराष्ट्राच्या हितासाठी काहीही करण्यास आम्ही तयार आहोत," अशा शब्दांत ठाकरे यांनी विरोधकांना रोखठोक संदेश दिला.
