| सांगली समाचार वृत्त |
सांगली - दि. २४ मे २०२५
डोंबिवलीहून लोकलने आणि नंतर बसने प्रवास करत सदानंद करंदीकर मंत्रालयात पोहोचले. त्यांच्या हातात होते दोन धनादेश – प्रत्येकी १० लाखांचे. एक पंतप्रधान सहाय्यता निधीसाठी, तर दुसरा मुख्यमंत्री सहाय्यता निधीसाठी. एकूण २० लाख रुपयांचा निधी त्यांनी समाजासाठी अर्पण केला.
सिंधुदुर्ग जिल्ह्यातील आचरा गावचे मूळ रहिवासी असलेले ८२ वर्षीय करंदीकर हे एका खासगी कंपनीमधून निवृत्त झाले आहेत. त्यांच्या पत्नी सुमती करंदीकर यांचं मागील वर्षी ऑगस्टमध्ये कर्करोगामुळे निधन झालं. त्या शासकीय सेवेत कार्यरत होत्या. अपत्य नसल्याने दोघंही नेरूळमधील आनंद वृद्धाश्रमात राहात होते.
पत्नीच्या आजारपणाच्या काळातील अनुभवामुळे करंदीकर यांना कर्करोगग्रस्तांच्या कुटुंबीयांची वेदना अधिक समजून आली. त्यामुळे त्यांनी आपल्या जीवनातील बचतीतून मोठा हिस्सा समाजासाठी वापरण्याचा निर्णय घेतला. या निर्णयामागे कोणतंही प्रसिद्धीचं आकर्षण नव्हतं, ना कुठली अपेक्षा.
मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या हस्ते त्यांनी धनादेश सुपूर्त केले. उपस्थित मान्यवरांनी करंदीकर यांच्या या कृत्याचं मनापासून कौतुक केलं.
करंदीकर सध्या बहीण प्रभा शितूत यांच्याकडे वास्तव्यास आहेत. "मी दानशूर नाही, ही माझी सामाजिक जबाबदारी आहे," असं सांगत त्यांनी नम्रपणे आपली भावना व्यक्त केली. "पत्नीच्या वेदना माझ्या आठवणींमध्ये आहेत. जर या निधीतून एखाद्या गरजू रुग्णाला दिलासा मिळाला, तर त्यापेक्षा मोठं समाधान दुसरं कोणतं?"
