| सांगली समाचार वृत्त |
मुंबई - सोमवार दि. १८ ऑगस्ट २०२५
डिजिटल व्यवहारांचा वापर वाढत असताना त्याचबरोबर ऑनलाइन फसवणुकीचे जाळेही वेगाने पसरत आहे. नुकतेच वनकार्डने आपल्या ग्राहकांना एक महत्त्वाचा इशारा दिला आहे. ‘व्हॉट्सॲप स्क्रीन मिररिंग स्कॅम’ नावाचा हा नवा धोका लोकांच्या खिशावर थेट घाला घालू शकतो.
व्हॉट्सॲप स्क्रीन मिररिंग स्कॅम म्हणजे काय?
सायबर गुन्हेगार पीडितांना चकवून स्क्रीन शेअरिंग सुरू करण्यास प्रवृत्त करतात. एकदा तुम्ही स्क्रीन शेअर केली की, तुमच्या मोबाईलवरील प्रत्येक हालचाल त्यांच्या नजरेसमोर येते. त्यातून पासवर्ड, ओटीपी, बँकिंग तपशील, वैयक्तिक संदेश सहज हेरले जातात आणि खात्यावरील नियंत्रण गमावले जाते.
फसवणुकीचा डाव कसा रचला जातो?
गुन्हेगार स्वतःला बँकेचा कर्मचारी किंवा आर्थिक संस्थेचा अधिकारी असल्याचे सांगतात.
खात्यात समस्या असल्याचे सांगून ते व्हॉट्सॲप व्हिडीओ कॉलवर बोलावतात.
कॉलदरम्यान स्क्रीन शेअर करण्यास सांगितले जाते.
तुम्ही व्यवहार करताना टाकलेला पासवर्ड/ओटीपी ते थेट पाहतात.
काही वेळा की-लॉगर सारखे अ‍ॅप मोबाईलमध्ये बसवले जाते, ज्यामुळे प्रत्येक टाइप केलेली माहिती त्यांच्यापर्यंत पोहोचते.
चोरलेली माहिती कशी वापरली जाते?
बँक खात्यातून अनधिकृत पैसे काढणे.
सोशल मीडिया आणि युपीआय खात्यांवर कब्जा.
वैयक्तिक ओळखपत्राचा गैरवापर करून पुढील फसवणूक.
सुरक्षित राहण्यासाठी काय कराल?
अनोळखी कॉलरवर कधीही विश्वास ठेवू नका.
स्क्रीन शेअरिंग करताना आर्थिक ॲप्स वापरणे टाळा.
मोबाईलमध्ये ‘Unknown Sources’ मधून ॲप्स इन्स्टॉल होणार नाहीत याची खात्री करा.
प्रत्येक ॲपमध्ये टू-फॅक्टर ऑथेंटिकेशन सुरू ठेवा.
संशयास्पद नंबर ब्लॉक करा आणि तक्रार करण्यासाठी cybercrime.gov.in किंवा १९३० या हेल्पलाइनचा वापर करा.
दबाव टाकणाऱ्या किंवा घाबरवणाऱ्या कॉलरच्या बोलण्याला बळी पडू नका.
डिजिटल जगात सुरक्षित राहायचे असेल, तर स्क्रीन शेअरिंग हा खेळ नक्कीच टाळा.
