| सांगली समाचार वृत्त |
सांगली - शुक्रवार दि. १ ऑगस्ट २०२५
सांगली जिल्ह्यातील प्रत्येक ग्रामपंचायतीच्या कार्यक्षेत्रात लवकरच अत्याधुनिक स्वयंचलित हवामान केंद्रांची स्थापना केली जाणार आहे. केंद्र शासनाच्या या महत्त्वाकांक्षी उपक्रमामध्ये सुमारे पाच बाय सात मीटर इतक्या जागेची आवश्यकता असून, स्थानिक शासकीय भूखंडांना प्राधान्य देण्यात येत आहे.
जिल्ह्यात सध्या अस्तित्वात असलेल्या 696 ग्रामपंचायतींपैकी 69 मंडल ठिकाणीच सध्या हवामान केंद्रे कार्यरत आहेत. मात्र, हे केंद्र एका मंडलापुरतेच सीमित असल्याने विविध गावांतील पर्जन्यमानाचा अचूक अंदाज लागत नाही. परिणामी, अवकाळी पावसामुळे होणाऱ्या नुकसानीच्या पंचनाम्यात अडथळे निर्माण होतात. या पार्श्वभूमीवर प्रत्येक गावात हवामान केंद्र असणे अपरिहार्य असल्याची गरज अधोरेखित झाली असून, त्यामुळे प्रत्येक दिवसाचे वास्तव हवामान चित्र शासनापर्यंत पोहोचणार आहे.
ही केंद्रे पूर्णतः सौरऊर्जेवर कार्यान्वित असून, त्याद्वारे तापमान, आर्द्रता, वार्‍याची दिशा आणि वेग, वायुदाब तसेच पावसाची दैनिक नोंद संकलित केली जाणार आहे. यामुळे अतिवृष्टीमुळे झालेल्या नुकसानीचा वैज्ञानिक पुरावा प्राप्त होणार असून, शेतकऱ्यांच्या मदतीसाठी अधिक बळकटी मिळणार आहे.
जिल्हा अधीक्षक कृषी अधिकारी विवेक कुंभार यांनी याबाबत माहिती देताना सांगितले की, खासगी संस्थांच्या माध्यमातून ही संपूर्ण यंत्रणा कार्यरत केली जाणार आहे. हे केंद्र केवळ हवामान मोजणीपुरते मर्यादित नसून, आगामी हवामानाची शक्यता वर्तवण्याचे कार्यही करतील. शेतीच्या नियोजनात यामुळे मोठी मदत होणार आहे.
सध्याच्या स्थितीत पावसाच्या नोंदी मुख्यत्वे तालुकास्तरावर घेतल्या जातात, ज्यामुळे संपूर्ण भागाचे प्रतिनिधित्व अचूक होत नाही. नव्या केंद्रांमुळे गावागावातील स्थिती स्पष्ट होणार असून, नुकसानभरपाई प्रक्रियेत पारदर्शकता येणार आहे.
