| सांगली समाचार वृत्त |
कवठेमहांकाळ - शनिवार दि. १९ जुलै २०२५
सांगली जिल्ह्यातील कवठेमहांकाळ परिसरातील एका खासगी इंग्रजी शाळेमध्ये विद्यार्थ्यांवर अत्याचाराचा धक्कादायक प्रकार उघडकीस आला आहे. मोहन माळी इंटरनॅशनल स्कूलमध्ये विद्यार्थ्यांना अपुरी आणि निकृष्ट जेवणाची सोय, तसेच मारहाणीचा सामना करावा लागत असल्याच्या तक्रारी पालकांनी केल्या आहेत. या पार्श्वभूमीवर संस्थाचालक मोहन माळी आणि दोन शिक्षकांविरोधात गुन्हा दाखल करण्यात आला आहे.
सुमारे २०० विद्यार्थ्यांचे शिक्षण सुरू असलेल्या या शाळेत शिक्षणाऐवजी दहशतीचे वातावरण असल्याचा आरोप पालकांनी केला आहे. विद्यार्थ्यांना अन्नामध्ये किडे असलेले पदार्थ दिले जात असल्याचे निदर्शनास आले असून, शिक्षणाऐवजी शारीरिक आणि मानसिक छळ सुरू असल्याचे स्पष्ट झाले आहे. एका प्रकरणात विद्यार्थ्यांना इतक्या अमानुषपणे मारहाण करण्यात आली की काहींना नाकातून रक्तस्राव झाला. यात पाच विद्यार्थी जखमी झाले असून त्यांच्यावर वैद्यकीय उपचार सुरू आहेत.
या प्रकारामुळे संतप्त झालेल्या १८ पालकांनी थेट कवठेमहांकाळ पोलीस ठाण्यात धाव घेत तक्रार दाखल केली. यानंतर पोलिसांनी तिघांविरोधात गंभीर स्वरूपाचा गुन्हा नोंदवला आहे. शाळेतील शिस्तभंग, विद्यार्थी हक्कांची पायमल्ली आणि शिक्षणाच्या नावाखाली होणारा अन्याय समोर आल्यानंतर प्रशासनही खडबडून जागं झालं आहे.
शिक्षण विभागाने या घटनेची गंभीर दखल घेतली असून, शाळेच्या कामकाजाची चौकशी सुरू आहे. गटशिक्षणाधिकाऱ्यांनी पाहणी केली असता अनेक अनियमितता आढळल्या. शिक्षण अधिकारी गायकवाड यांनी शाळेच्या मान्यतेवर प्रश्नचिन्ह उपस्थित करत, लवकरच तिची मान्यता रद्द करण्याचा प्रस्ताव पाठवला जाणार असल्याचे सांगितले.
या प्रकारामुळे अनेक पालक आपापल्या मुलांच्या सुरक्षेच्या चिंतेने हैराण झाले असून, दुसऱ्या शाळेत प्रवेश घेण्यासाठी प्रयत्न करत आहेत. या प्रकरणात बाल हक्क संरक्षण कायदा तसेच ‘पॉक्सो’ अंतर्गत कडक कारवाई होणार असल्याचे संकेत प्रशासनाने दिले आहेत.
