| सांगली समाचार वृत्त |
जत - बुधवार दि. ३० जुलै २०२५
जत तालुक्यातील उमदी येथे पोलीसांसाठी उभारल्या जाणाऱ्या शासकीय निवासस्थानाच्या भूमिपूजन सोहळ्यात जिल्ह्याचे पालकमंत्री चंद्रकांत पाटील यांनी सुरक्षा दलाच्या सुविधांमध्ये भरीव वाढ करण्याचा निर्धार व्यक्त केला. या नव्या निवासस्थानी प्रकल्पामुळे पोलिसांचे मनोबल उंचावेल आणि गुन्हेगारी नियंत्रणासाठी कार्यक्षमता अधिक प्रभावीपणे समोर येईल, असा विश्वास त्यांनी यावेळी व्यक्त केला.
उमदी पोलीस ठाणे अंतर्गत अधिकारी व कर्मचारी वर्गासाठी उभारल्या जाणाऱ्या निवासस्थानासाठी ३.४५ कोटी रुपयांचा निधी जिल्हा नियोजन समितीमार्फत मंजूर करण्यात आला असून, इमारतीचे काम येत्या आठ ते नऊ महिन्यांत पूर्ण करण्याचे उद्दिष्ट आहे. सौरऊर्जा पॅनेल, अत्याधुनिक सुविधा आणि आवश्यक फर्निचरसह हा प्रकल्प उभारण्यात येणार आहे, अशी माहितीही पालकमंत्र्यांनी दिली.
कार्यक्रमात आमदार गोपीचंद पडळकर, पोलीस अधीक्षक संदीप घुगे, उपविभागीय अधिकारी अजयकुमार नष्टे, अप्पर पोलीस अधीक्षक कल्पना बाराबकर, पोलीस अधिकारी सुनील साळुंखे व इतर मान्यवरांची उपस्थिती होती.
उमदी हे कर्नाटक सीमेवर असलेले गाव असल्याने, येथे पोलिसांची सतत उपस्थिती अत्यावश्यक आहे. पोलिसांना मुख्यालयी निवासाची सुविधा मिळाल्याने त्यांचे मानसिक स्वास्थ्य टिकून राहील आणि सीमावर्ती भागात कायदा-सुव्यवस्थेचे संरक्षण अधिक प्रभावी होईल. याबाबत जनतेनेही सतर्क राहून पोलीस यंत्रणेला सहकार्य करावे, असे आवाहन पालकमंत्र्यांनी केले.
तालुक्यातील रोजगाराच्या संधी वाढवण्यासाठी तसेच स्थानिक उत्पादनांना बाजारपेठ उपलब्ध करून देण्यासाठी रांजणी ड्राय पोर्टच्या प्रश्नी पाठपुरावा सुरू असल्याचेही चंद्रकांत पाटील यांनी स्पष्ट केले. करजगी अत्याचार प्रकरणात जलदगती न्यायालयात खटला लढण्यात येत असून दोषींना कठोर शिक्षा होण्यासाठी प्रशासन कटिबद्ध असल्याचे त्यांनी नमूद केले.
आमदार गोपीचंद पडळकर यांनी यावेळी उमदी परिसरात दुकानगाळ्यांची निर्मिती, पोलीस ठाण्यासाठी नवीन इमारत, शुद्ध इंधनासाठी पेट्रोल पंप, तसेच स्थानिक पातळीवर उद्योगधंद्यांना चालना मिळावी म्हणून एमआयडीसी स्थापनेचा प्रस्ताव मांडला. बंद पडलेले विश्रामधाम पुन्हा सुरू करण्याचीही मागणी त्यांनी केली.
पोलीस अधीक्षक संदीप घुगे यांनी यावेळी सांगितले की, उमदी पोलीस ठाण्याचा इतिहास १९४९ पासूनचा असून सध्या येथे ५० च्या आसपास कर्मचारी कार्यरत आहेत. परंतु उपलब्ध निवासस्थानांची संख्या कमी आणि सध्याची घरे राहण्यालायक नसल्याने, नवीन निवासस्थान प्रकल्प हे पोलीस दलासाठी वेळोवेळी महत्त्वाचे ठरेल.
प्रास्ताविक सहाय्यक पोलीस निरीक्षक संदीप कांबळे यांनी केले तर आभारप्रदर्शन उपविभागीय अधिकारी सुनील साळुंखे यांनी व्यक्त केले.
कार्यक्रमाच्या प्रारंभी मान्यवरांच्या हस्ते कोनशीला अनावरण व भूमिपूजनाचा विधी पार पडला. या सोहळ्यास पोलीस अधिकारी, कर्मचारी, स्थानिक लोकप्रतिनिधी व नागरिक मोठ्या संख्येने उपस्थित होते.
