| सांगली समाचार वृत्त |
नवी दिल्ली - बुधवार दि. ११ जून २०२५
कॅनडामध्ये पुन्हा एकदा खलिस्तानी चळवळीने डोके वर काढले आहे. भारतविरोधी घोषणांसह सुरू झालेल्या निदर्शनांनी आता गंभीर वळण घेतले असून, पंतप्रधान नरेंद्र मोदी यांना जीवे मारण्याची धमकी देण्यात आली आहे. इंदिरा गांधी यांच्या हत्येचा उल्लेख करत, त्याचप्रमाणे कारवाई करण्याची चेतावणी दिली गेली आहे. या पार्श्वभूमीवर भारताने तीव्र निषेध व्यक्त केला आहे.
कॅनडाचे नवे पंतप्रधान मार्क कार्नी यांनी भारताशी संबंध सुधारण्याचे संकेत दिले होते, मात्र अशा धमक्यांमुळे त्यांच्या प्रयत्नांनाही मोठा धक्का बसला आहे. सोशल मीडियावर खलिस्तानी समर्थकांचा एक व्हिडिओ मोठ्या प्रमाणावर व्हायरल होत असून, त्यात मोदींविरोधात उघडपणे हल्ल्याची भाषा करण्यात आली आहे.
भारत सरकारने या प्रकाराची गंभीर दखल घेतली असून, कॅनडाकडे अधिकृतपणे तक्रार नोंदवून कडक कारवाईची मागणी केली आहे. तथापि, अद्यापही कॅनडाकडून ठोस पावले उचलली गेली नसल्याने भारतात संतापाची लाट उसळली आहे.
याशिवाय, कॅनडामधील भारतीय राजनैतिक प्रतिनिधींवर होणाऱ्या छळवणुकीबाबतही चिंता व्यक्त करण्यात आली आहे. भारताच्या परराष्ट्र मंत्रालयाने या साऱ्या घटनांचा तीव्र निषेध करत कॅनडाला जबाबदारीने वागण्याचे आवाहन केले आहे.
नुकत्याच पार पडलेल्या निदर्शनांदरम्यान भारताचा राष्ट्रीय ध्वज फाडून जाळण्यात आला आणि भारतविरोधी घोषणा देण्यात आल्या. खलिस्तानी संघटनांनी मोदी कॅनडात आल्यास, त्यांच्यावर प्राणघातक हल्ला करण्याची धमकी दिली. या पार्श्वभूमीवर देशांतर्गत आणि आंतरराष्ट्रीय पातळीवर याचे तीव्र पडसाद उमटत आहेत.
