| सांगली समाचार वृत्त |
नवी दिल्ली - गुरुवार दि. ५ जून २०२५
दिल्लीच्या जुन्या राजिंदर नगर परिसरातील एका कोचिंग सेंटरच्या तळघरात पाण्याचा मोठा साठा झाल्याने तीन तरुण विद्यार्थ्यांचा दुर्दैवी मृत्यू झाला. या घटनेची गंभीर दखल घेत सर्वोच्च न्यायालयाने स्वतःहून हस्तक्षेप केला असून, केंद्र सरकार, दिल्ली सरकार आणि दिल्ली महापालिकेला यासंदर्भात स्पष्ट अहवाल सादर करण्याचे निर्देश दिले आहेत.
न्यायमूर्ती सूर्यकांत आणि उज्वल भुयान यांच्या खंडपीठाने स्पष्ट शब्दांत म्हटले आहे की, “दिल्लीतील अनेक कोचिंग सेंटर्स ही सुरक्षिततेच्या मूलभूत निकषांकडे पूर्णपणे दुर्लक्ष करतात. त्यांनी जीवनरक्षणाच्या निकषांचे पालन न केल्यास अशा संस्था केवळ ऑनलाइन पद्धतीनेच कार्यरत ठेवाव्यात.”
न्यायालयाने यावेळी कोचिंग सेंटर्सना "डेथ चेंबर्स" अशी उपमा देत विद्यार्थ्यांच्या जीवाशी खेळ होतो आहे, असे तीव्र शब्दांत नमूद केले. विद्यार्थ्यांच्या सुरक्षिततेचा प्रश्न उपस्थित करत सर्वोच्च न्यायालयाने या प्रकाराची सखोल चौकशी आणि कारवाईची गरज व्यक्त केली आहे.
या दुर्घटनेत उत्तर प्रदेशची श्रेया यादव (२५), बिहारची तान्या सोनी (२५) आणि केरळचा नेविन डेल्विन (२४) यांचा मृत्यू झाला. या पार्श्वभूमीवर राजधानीत अनेक विद्यार्थ्यांनी सुरक्षा उपायांची मागणी करत आंदोलन सुरू केले आहेत.
तसेच, तळघराचा सहमालक असल्याचा आरोप असलेल्या व्यक्तीचा जामीन अर्ज तीस हजारी न्यायालयाने फेटाळून लावला आहे, ज्यामुळे प्रकरण अधिक गांभीर्याने घेतले जात असल्याचे स्पष्ट झाले आहे.
