फोटो सौजन्य : दै. ललकार
| सांगली समाचार वृत्त |
सांगली - सोमवार दि. ३० जून २०२५
संगीताच्या गगनदिव्य स्वरांची शतपर्वी झळाळी सांगलीत अनुभवायला मिळाली. 'फिरसे केडब्ल्यूसी' आणि 'गीत संगीत आनंद यात्रा' यांच्या संयुक्त विद्यमाने भारतरत्न लता मंगेशकर यांच्या अमृतस्मृतीला समर्पित स्वरशताब्दी महोत्सवाने एशिया पॅसिफिक रेकॉर्डमध्ये आपले अजरामर स्थान मिळवले आहे.
विष्णूदास भावे नाट्यमंदिरात झालेल्या या ऐतिहासिक कार्यक्रमात तब्बल १०० अजरामर गीतांचे सलग सादरीकरण झाले. सकाळी ११ वाजल्यापासून सायंकाळी ६ वाजेपर्यंत संगीताचा अखंड प्रवाह रसिकांच्या हृदयात झिरपत राहिला. या गायन महायज्ञात १२ महिला आणि ५ पुरुष गायकांनी सहभाग घेतला. दोन निवेदकांच्या संयत सादरीकरणाने कार्यक्रमाला योग्य दिशा दिली.
या गायन प्रवासाला १६ कुशल वादकांची दिलासादायक साथ लाभली. प्रत्येक गीताने रसिकांच्या मनावर ठसा उमटवला, आणि उपस्थितांनी टाळ्यांच्या गजरात या कलासाधनेला भरभरून दाद दिली.
कार्यक्रमानंतर निरीक्षक निखिल चांडक यांनी याची एशिया पॅसिफिक रेकॉर्डमध्ये नोंद झाल्याची अधिकृत घोषणा केली. याप्रसंगी संयोजक विष्णू शिंदे यांना सन्मानचिन्ह आणि प्रमाणपत्र देण्यात आले.
संगीतासाठी तनमनाने झटणाऱ्या या संपूर्ण चमूत वादक अविनाश इनामदार, संग्राम कांबळे, निलेश मोहिते, शिवाजी सुतार, आनंद कमते, अक्षय अवघडे, रितिक साटम, राम चौगुले, गुरु ढोले, सचिन देसाई, विनोद सावंत, शब्बीर बारगीर, शौनक व अजय भोगले, लमुवेल आठवले यांचा उल्लेख विशेष महत्त्वाचा आहे. सांगलीच्या संगीतप्रेमींसाठी हा एक अविस्मरणीय दिवस ठरला – स्वरांचे हे शतक आता जागतिक नोंदीत अजरामर झाले आहे.
