फोटो सौजन्य : दै. सत्यदूत
| सांगली समाचार वृत्त |
सांगली - सोमवार दि. २३ जून २०२५
संयोग चॅरिटेबल ट्रस्टच्या उपक्रमातून आयोजित करण्यात आलेल्या ‘सांगली हेरिटेज वॉक’ ला स्थानिक नागरिकांचा उस्फुर्त प्रतिसाद लाभला. रविवार, २२ जून २०२५ रोजी सकाळी ७ वाजता सांगली हायस्कूलपासून या ऐतिहासिक व ज्ञानवर्धक सफरीची सुरुवात झाली. सांगलीच्या वैभवशाली भूतकाळाची उजळणी करणाऱ्या या वॉकमधून शहरातील ऐतिहासिक वास्तूंचा समृद्ध वारसा उलगडण्यात आला.
या वॉकचे वैशिष्ट्य म्हणजे ज्येष्ठ पत्रकार चिंतामणी सहस्रबुद्धे आणि वास्तुविशारद प्रमोद चौगुले यांचे अभ्यासपूर्ण मार्गदर्शन. त्यांनी सांगलीतील जुन्या वास्तूंचा इतिहास, स्थापत्यशास्त्र, आणि सामाजिक संदर्भ उपस्थितांना रसाळ भाषेत उलगडून दाखवले.
वॉकची सुरुवात झाली ती सांगली हायस्कूल या ११८ वर्षे जुन्या शिक्षणमंदिरापासून. केवळ शिक्षणाचे नव्हे, तर सामाजिक परिवर्तनाचेही साक्षीदार असलेल्या या शाळेच्या ब्रिटिशकालीन दगडी रचनेने अनेकांचे लक्ष वेधले.
यानंतरचा टप्पा होता १०५ वर्षांपूर्वी स्थापन झालेल्या महात्मा गांधी ग्रंथालयाचा. हे ग्रंथालय म्हणजे सांगलीच्या वाचनसंस्कृतीचा आत्मा. हजारो ग्रंथांचे भांडार, अभ्यासकांसाठी मौल्यवान संदर्भसाहित्य, आणि एका विचारशील परंपरेचे हे केंद्र ठरते.
संयोग चॅरिटेबल ट्रस्टचा हा उपक्रम केवळ भूतकाळाची उजळणी करणारा नाही, तर वर्तमानात शहराबद्दल अभिमान निर्माण करणारा ठरला. नव्या पिढीला आपल्या शहराचा इतिहास कळावा, त्याचं जतन व्हावं आणि तो अभिमानाने पुढील पिढीकडे पोहोचावा, यासाठी अशा वॉकची गरज अधिक तीव्रपणे जाणवते.
चिंतामणी सहस्रबुद्धे आणि प्रमोद चौगुले यांच्या अभ्यासपूर्ण माहितीमुळे वॉक एक ऐतिहासिक प्रवास ठरला. या अनुभवातून सांगलीच्या वारशाशी नव्याने जोडले गेलेले हे नाते पुढील टप्प्याकडे उत्सुकतेने पाहत आहे – पुढचा वॉक कुठे, कधी, कसा? याचे उत्तर आता सांगलीकर उत्सुकतेने वाट पाहत आहेत.
