| सांगली समाचार वृत्त |
बुलढाणा - दि. १७ मे २०२५
भाजपचे नेते आणि राज्याचे उपमुख्यमंत्री देवेंद्र फडणवीस यांनी शिवसेना (ठाकरे गट) खासदार संजय राऊत यांच्या नव्या पुस्तकावर प्रतिक्रिया देताना टोलेबाजी केली. "आता मी कथा-कादंबऱ्या वाचत नाही आणि बालवाङ्मय वाचण्याचं वयही माझं संपलं आहे," असं म्हणत फडणवीसांनी राऊतांच्या पुस्तकावर अप्रत्यक्षपणे टीका केली.
भाजपच्या बुलडाणा जिल्हा कार्यालयाच्या भूमिपूजनासाठी ते शहरात आले होते. कार्यक्रमानंतर पत्रकारांशी बोलताना ‘नरकातला स्वर्ग’ या राऊत लिखित पुस्तकावर प्रश्न विचारण्यात आला होता. या पुस्तकात पंतप्रधान नरेंद्र मोदी आणि केंद्रीय गृहमंत्री अमित शहा यांच्याबद्दल काही दावे करण्यात आले असून, "आम्ही अजून लिहिलं असतं तर मोठा गदारोळ झाला असता," असं राऊत यांनी म्हटलं आहे.
फडणवीसांची टीका – "त्यांना इतकं महत्त्व द्यायचं कारण नाही"
या विधानावर उत्तर देताना फडणवीस म्हणाले, "कथा-कादंबऱ्या वाचण्याचा काळ मागे राहिला आहे. अशा गोष्टींवर गांभीर्याने विचार करण्याची गरज नाही." याचसोबत, "ते कोण आहेत? ते खरोखर मोठे नेते आहेत का?" असा उपरोधिक सवाल करत त्यांनी राऊतांवर निशाणा साधला.
स्थानिक निवडणुकीबाबत महायुतीचा निर्धार
राज्यातील आगामी स्थानिक स्वराज्य संस्थांच्या निवडणुकांबाबत फडणवीस म्हणाले की, "महायुतीच्या माध्यमातूनच निवडणुका लढवल्या जातील. काही अपवादात्मक ठिकाणी वेगळे निर्णय घेतले जातील, पण ते परस्पर समन्वयातूनच ठरतील." यासंदर्भात त्यांनी गुरुवारीच काही मुद्दे स्पष्ट केले असल्याचंही नमूद केलं.
