| सांगली समाचार वृत्त |
सांगली - दि. १३ एप्रिल २०२५
राज्य शासनाच्या कृषी विभागाच्या विविध योजनांचा लाभ घेण्यासाठी येत्या १५ एप्रिल २०२५ पासून ‘शेतकरी ओळखपत्र’ (Farmer ID) आवश्यक राहणार असल्याची माहिती तहसीलदार योगेश टोम्पे यांनी दिली आहे. तहसीलदार टोम्पे यांनी सांगितले की, कृषी विभागातर्फे शेतकऱ्यांसाठी अनेक महत्त्वपूर्ण योजना राबविल्या जातात. परंतु, यापुढे या योजनांचा लाभ मिळवण्यासाठी शेतकऱ्यांकडे ‘शेतकरी ओळख क्रमांक’ असणे अनिवार्य असेल.
'शेतकरी ओळख क्रमांक' म्हणजे काय?
हा क्रमांक म्हणजेच शेतकऱ्याची ओळख दर्शवणारा एकमेव आधार असेल. या क्रमांकाशी संबंधित माहिती – जसे की जमीनाचा तपशील, त्या जमिनीवर घेतलेली पिके इत्यादी डेटा – कृषी विभागाच्या विविध ऑनलाइन प्रणालींशी API (Application Programming Interface) च्या माध्यमातून जोडले जाईल आणि 'अ‍ॅग्री स्टॅक' या डिजिटलकृत प्रणालीचा भाग होईल.
नोंदणी अद्याप केली नसेल तर काय करावे?
ज्या शेतकऱ्यांनी अजूनपर्यंत शेतकरी ओळखपत्रासाठी नोंदणी केलेली नाही, त्यांनी तातडीने संबंधित पोर्टल्सवर किंवा संकेतस्थळांवर जाऊन नोंदणी करावी. आवश्यक असल्यास ग्राम कृषी विकास समिती, सेतू कार्यालय किंवा स्थानिक कृषी यंत्रणांची मदत घ्यावी.
'ओळखपत्र क्रमांकाशिवाय' लाभ मिळणार नाही!
या नवीन नियमांनुसार, १५ एप्रिल २०२५ नंतर शेतकरी ओळख क्रमांकाशिवाय कोणतीही योजना लागू होणार नाही, हे स्पष्ट करत तहसीलदारांनी शेतकऱ्यांना वेळेत नोंदणी करण्याचे आवाहन केले आहे.
