| सांगली समाचार वृत्त |
सांगली - दि. १८ एप्रिल २०२५
सांगली – मराठा आरक्षणासाठी झटणारे आणि सामाजिक चळवळींमध्ये सक्रिय असलेले अखिल भारतीय मराठा सेवा संघाचे संस्थापक, तसेच मराठा आरक्षण समन्वय समितीचे राज्याध्यक्ष विजयसिंह महाडिक यांचे तिसऱ्या मजल्यावरून पडून दुर्दैवी निधन झाले. ही घटना त्यांच्या वाघवाडी, अभियंता नगर येथील निवासस्थानी घडली.
वयाच्या ६५ व्या वर्षी त्यांनी शेवटचा श्वास घेतला. महाडिक हे सामाजिक आणि राजकीय क्षेत्रात गेल्या अनेक वर्षांपासून कार्यरत होते. मराठा समाजाच्या हक्कांसाठी लढा देणाऱ्या व्यक्तींमध्ये त्यांचा अग्रगण्य समावेश होता. त्यांनी नारायण राणे, देवेंद्र फडणवीस यांच्यासारख्या नेत्यांबरोबर आरक्षणासंदर्भात चर्चाही केली होती.
२००७ पासून त्यांनी मराठा आरक्षणासह २७ विविध मागण्यांसाठी सरकारवर सातत्याने दबाव टाकला. २०१६ मध्ये त्यांनी नऊ दिवस उपोषण करत समाजाच्या मागण्या सरकारपर्यंत पोहोचविल्या. त्यांनी राज्यातील तब्बल ४२ संघटनांना एकत्रित करून आरक्षण समन्वय समिती स्थापन केली होती.
महाडिक यांच्या कार्याची मराठा समाजात मोठी दखल घेतली जात होती. त्यांनी “शौर्य दिन” निमित्त पानिपत येथे भव्य कार्यक्रम घेत मराठा समाजाची एकता आणि शक्ती दाखवून दिली होती. आरक्षणासाठीच्या आंदोलनात त्यांनी नेहमी आघाडी घेतली.
त्यांचे अचानक जाणे समाजासाठी मोठी हानी मानली जात आहे. त्यांच्या कार्यामुळे अनेकांना प्रेरणा मिळाली असून, त्यांच्या समर्पणाची आठवण कायम स्मरणात राहील. विजयसिंह महाडिक यांचे निधन हे मराठा समाजासाठी अपूरणीय नुकसान आहे.
