| सांगली समाचार वृत्त |
मिरज - दि. १३ जानेवारी २०२५
आरग (ता. मिरज) येथील पद्मावती मंदिरातून सोन्या-चांदीचे दागिने चोरणार्‍या चोरट्याला जेरबंद करण्यात स्थानिक गुन्हे अन्वेषण विभागाला यश आले. अक्षय अर्जुन मोरे (वय 27, रा. गोंदीलवाडी रेल्वे गेट, पलूस-आमणापूर रस्ता, ता. पलूस) असे संशयिताचे नाव आहे. त्याच्याकडून सोन्या-चांदीचे दागिने व दुचाकी असा 9 लाख 54 हजार रुपयांचा मुद्देमाल जप्त केला.
आरग येथे शीतल आण्णासाहेब उपाध्ये (वय 60) यांच्या मालकीचे पद्मावती मातेचे मंदिर आहे. दि. 8 रोजी मध्यरात्रीनंतर अक्षय याने मंदिरातील गाभार्‍यात प्रवेश करून मूर्तीस घातलेले सोन्या-चांदीचे दागिने चोरून नेले. दि. 9 रोजी पहाटे हा प्रकार उघडकीस आला. मिरज ग्रामीण पोलिसांसह स्थानिक गुन्हे अन्वेषणच्या पथकाने घटनास्थळी धाव घेतली. सीसीटीव्ही फुटेजमध्ये संशयित चोरटा कैद झाला होता. हे 'फुटेज' सर्वत्र 'व्हायरल' झाले होते. परंतु अक्षयचा चेहरा स्पष्ट दिसत नसल्यामुळे तपासाचे आव्हान होते.
एलसीबीचे निरीक्षक सतीश शिंदे यांनी सहायक निरीक्षक पंकज पवार आणि कर्मचार्‍यांच्या पथकाला चोरट्याचा माग काढण्याच्या सूचना दिल्या होत्या. पथकास आरग येथील मंदिरात चोरी करणारा संशयित दागिने विक्री करण्यासाठी पाचवा मैल (ता. पलूस) येथे दुचाकीवरून फिरत असल्याची माहिती मिळाली. त्यानुसार पथकाने सापळा रचून त्याला ताब्यात घेतले. त्याच्या सॅकमध्ये सोन्या-चांदीचे दागिने मिळाले. याबाबत चौकशी करता, त्याने पद्मावती मंदिरात चोरी केल्याची कबुली दिली. त्याच्याकडून 7 लाख 49 हजार रुपयांचे सोन्याचे दागिने, 1 लाख 40 हजार रुपयांचे चांदीचे दागिने, 65 हजार रुपयांची दुचाकी असा 9 लाख 54 हजार रुपयांचा मुद्देमाल जप्त केला. त्याला मिरज ग्रामीण पोलिसांच्या ताब्यात दिले.
ही कारवाई निरीक्षक सतीश शिंदे, सहायक निरीक्षक पंकज पवार, नितीन सावंत, कर्मचारी अनिल कोळेकर, दरिबा बंडगर, सागर लवटे, सागर टिंगरे, संदीप गुरव, नागेश खरात, सतीश माने, महादेव नागणे, मच्छिंद्र बर्डे, अमर नरळे, इम्रान मुल्ला, संकेत मगदूम, सचिन धोत्रे यांच्या पथकाने केली.
अक्षय सराईत गुन्हेगार
पद्मावती मंदिरातील चोरीप्रकरणी अटक केलेला अक्षय मोरे हा सराईत गुन्हेगार आहे. त्याच्याविरुद्ध पलूस, विश्रामबाग पोलिस ठाण्यात मालमत्तेविरुद्धचे गुन्हे दाखल असल्याचे निरीक्षक सतीश शिंदे यांनी सांगितले.
