| सांगली समाचार वृत्त |
मुंबई - दि. २५ जानेवारी २०२५
देशभरातील 200 टोल प्लाझांवर तब्बल 120 कोटी रुपयांचा मोठा घोटाळा उघड झाला आहे. उत्तर प्रदेश एसटीएफने (विशेष कार्य बल) NHAI (भारतीय राष्ट्रीय महामार्ग प्राधिकरण) च्या टोल प्लाझांवर छापेमारी करून या घोटाळ्याचा पर्दाफाश केला आहे. लखनऊ एसटीएफने मिर्झापूरच्या लालगंज येथील अटराइला टोल प्लाझावर कारवाई करत टोल व्यवस्थापकासह 4 आरोपींना अटक केली.
कारवाईत मिळाले महत्त्वाचे पुरावे
छापेमारीत एसटीएफने आरोपींकडून 5 मोबाईल, 2 लॅपटॉप, प्रिंटर आणि 19,000 रुपये जप्त केले आहेत. एसटीएफ निरीक्षक दीपक सिंह यांनी सांगितले की, डझनभर टोल प्लाझांवरील अनियमिततेच्या तक्रारींनंतर ही कारवाई केली गेली.
घोटाळ्याचा प्रकार
आरोपींनी NHAI च्या सॉफ्टवेअरमध्ये छेडछाड करत फास्टॅग नसलेल्या किंवा कमी शिल्लक असलेल्या खात्यांमधून टोल संकलनात गैरव्यवहार केला. यासाठी त्यांनी एक विशेष सॉफ्टवेअर तयार केले होते.
घोटाळ्याचा मास्टरमाईंड
या घोटाळ्याचा मुख्य सूत्रधार आलोक नावाचा अभियंता असल्याचे समोर आले आहे. तो NHAI साठी सॉफ्टवेअर तयार करणाऱ्या टीमचा भाग होता. टोल प्लाझाच्या कर्मचारी व कंत्राटदारांच्या मदतीने त्याने 200 हून अधिक टोल प्लाझांवर घोटाळ्याचे जाळे उभे केले.
कोट्यवधींची फसवणूक
आरोपींनी फास्टॅगशिवाय वाहनांकडून अवैध वसुली केली तसेच नियम डावलून NHAI ला होणारा महसूल बुडवला. या प्रकरणात महाराष्ट्रासह उत्तर प्रदेश, राजस्थान, गुजरात, जम्मू-काश्मीर, ओडिशा, आणि आसाम अशा 12 राज्यांचा समावेश आहे.
न्यायालयीन कारवाई सुरू
या प्रकरणातील आरोपींवर कडक कारवाईची तयारी सुरू असून, एसटीएफ पुढील तपास करत आहे. NHAI च्या इतर टोल प्लाझांवरही चौकशी केली जात आहे.
