| सांगली समाचार वृत्त |
मुंबई - दि. १ डिसेंबर २०२४
महाराष्ट्रातील नव्या सरकार स्थापनेचा मुहूर्त ठरला असून, विधानसभा निवडणुकीचा निकाल लागून तब्बल 8 दिवस उलटल्यानंतर अखेर महायुतीला मुहूर्त सापडला. डिसेंबर 5 गुरुवारी संध्याकाळी 5 वाजता पंतप्रधान नरेंद्र मोदींच्या उपस्थितीत मुख्यमंत्रीसह अनेक मंत्री शपथ घेणार आहेत. महाराष्ट्राचा मुख्यमंत्री कोण होणार. नव्या सरकारचा शपथविधी कधी होणार? हा प्रश्न महाराष्ट्रातील प्रत्येक मराठी माणसाच्या मनात आहे. शपथविधी 5 डिसेंबरला होणार हे निश्चित झालं असलं तरी महाराष्ट्राचा मुख्यमंत्री कोण होणार हे अजून अधिकृतरित्या जाहीर झालेलं नाही. महाराष्ट्राचा मुख्यमंत्री कोण होणार हे राजकीय पक्षांच्या नेत्यांच्या लक्षात आलंय. पण कोणीही जाहीर काहीच बोलायला तयार नाही. सोमवारी किंवा मंगळवारी विधिमंडळ गटनेता निवड होईल असं भाजप प्रदेशाध्यक्ष चंद्रशेखर बावनकुळेंनी सांगितलं आहे.
शपथविधीची घोषणा भाजप प्रदेशाध्यक्ष चंद्रशेखर बावनकुळे यांनी काल सोशल मीडियावर केली. गुरुवारी 5 डिसेंबरला संध्याकाळी 5 वाजता आझाद मैदानावर महाराष्ट्राचा नव्या सरकारचा शपथविधी होणार असल्याचं त्यांनी म्हटलं आहे.
आपापल्या जिल्ह्यामध्ये जल्लोष करा !
सर्व आमदारांना येत्या 5 डिसेंबरला महाराष्ट्राच्या नव्या सरकारचा शपथविधी होणार आहे. या शपथविधीला सर्व आमदारांना उपस्थित राहावे, अशा सूचना देण्यात आल्या आहेत. तसंच मुंबईबाहेरील आमदारांनी मुंबईत येण्यासाठी तयार राहावे, अशीही सूचना यावेळी करण्यात आली. तसंच महायुती सरकारचा शपथविधी होत असताना आपापल्या जिल्ह्यामध्ये जल्लोष करा, असं आवाहनही चंद्रशेखर बावनकुळे यांच्याकडून करण्यात आलं आहे.
मुख्यमंत्री भाजपचाच होणार - मुनगंटीवार
दरम्यान, महाराष्ट्राचा मुख्यमंत्री हा भाजपचाच होणार, माध्यमं जो चेहरा दाखवतात तोच मुख्यमंत्री होणार असं, भाजप नेते सुधीर मनुगंटीवार यांनी झी २४ तासशी बोलताना सांगितलं. महायुतीच्या नव्या सरकारचा फॉर्म्युला ठरला असून,, राज्यात भाजपचा मुख्यमंत्री होणार, अशी माहिती अजित पवारांनी यांनीही दिली आहे. तर 'दोन पक्षाचे दोन उपमुख्यमंत्री होणार असल्याचं करण्याचंही त्यांनी म्हटलं आहे.
भाजपला सर्वाधिक 25 मंत्रिपदं मिळणार ?
महायुती सरकारचा मंत्रिपदांचा फॉर्म्युला जवळपास निश्चित झालाआहे. भाजपला सर्वाधिक पंचवीस मंत्री पद मिळणार आहेत. त्यांच्यातील वरिष्ठ नेत्यांकडे महत्त्वाची खाते राहणार असून, त्यानंतर शिवसेनेला 9 कॅबिनेट, 3 राज्यमंत्रिपदं तर राष्ट्रवादीला 6 कॅबिनेट आणि 2 राज्यमंत्रिपदं मिळणार असल्याची खात्रीदायक सूत्रांची माहिती आहे. शिवसेनेला नगरविकास खातं मिळण्याची शक्यता असल्याची माहिती सूत्रांनी दिली आहे.
