| सांगली समाचार वृत्त |
नवी दिल्ली - दि. ९ जून २०२४
राष्ट्रीय महामार्ग आणि द्रुतगती मार्गावरील टोलनाक्यांवरील लांबच लांब रांगाचा त्रास वाहनचालकांना सहन करावा लागतो. वाहनचालकांचा हा त्रास आता लवकरच संपणार आहे. सॅटेलाईट आधारित इलेक्ट्रॉनिक टोल वसुली यंत्रणा लवकरच सुरु करण्याच्या सरकार विचार करीत आहे. यासाठी भारतीय राष्ट्रीय महामार्ग प्राधिकरण (NHAI) ने सॅटेलाईट आधारित इलेक्ट्रॉनिक टोल वसूली सिस्टीम लागू करण्यासाठी जगभरातील ईओआई (EOI) ला आमंत्रित केले आहे. ग्लोबल नेव्हिगेशन सॅटेलाइट सिस्टम (GNSS) वर आधारित ही सिस्टीम राष्ट्रीय महामार्गांवर चालणाऱ्या वाहनांसाठी सीमलेस टोल वसूली करण्यास मदत करेल.
टोलनाके बंद होणार का ?
शुक्रवारी एका अधिकृत निवेदनात म्हटले आहे की, ग्लोबल नॅव्हिगेशन सॅटेलाइट सिस्टम (GNSS) वर आधारित या सिस्टिम राष्ट्रीय महामार्गांवर चालणाऱ्या वाहनांच्या चालकांना टोल संकलनाचा एक चांगला अनुभव देईल. एनएचआयच्या या उपक्रमाचा उद्देश महामार्गांवर सुरु असलेले टोल नाके बंद करणे हा उद्देश आहे. राष्ट्रीय महामार्गावर वाहनचालकांना त्रासमुक्त टोल संकलनाचा अनुभव देण्यासाठी आणि टोल ऑपरेशन्सची कार्यक्षमता आणि पारदर्शकता वाढवण्यासाठी एनएचएआय (NHAI) कंपनी इंडियन हायवे मॅनेजमेंट कंपनी लिमिटेड (IHMCL)ने भारतात जीएनएसएस (GNSS) आधारित इलेक्ट्रॉनिक टोल संकलन सिस्टिम विकसित आणि अंमलबजावणीसाठी पात्र कंपन्यांकडून ईओआई मागविण्यात आला आहे.
फास्टॅगमधून पैसे कापले जातील
निवेदनात म्हटले आहे की, NHAI च्या सध्या उपलब्ध असलेल्या FASTag सिस्टिमच्या अंतर्गत GNSS आधारित इलेक्ट्रॉनिक टोल कलेक्शन (ETC) सिस्टिम लागू करण्याची योजना सध्या सुरु आहे. सुरुवातीला एक मिश्रित मॉडेलला स्विकारण्याची योजना आहे. ज्यामध्ये आरएफआईडी आधारित ईटीसी आणि जीएनएसएस आधारित ईटीसी यांचा समावेश आहे. या दोन्ही एकत्र काम करतील.
सॅटेलाईट सिस्टिमचा या ठिकाणी प्रयोग
सरकारकडून काही भागांमध्ये सॅटेलाईट टोल वसूलीचा प्रयोग करण्यात आला आहे. या प्रक्रियेत कोणत्या अडचणी येतात हे जाणून घेण्यासाठी याबाबतचा प्रयोग सुरु आहे. देशातील बंगळूरु, पानिपत आणि म्हैसूर या ठिकाणी हा प्रयोग सुरु करण्यात आल्याची माहिती नितीन गडकरी यांनी दिली होती.
जीपीएस बेस्ड टोल कलेक्शन
जीपीएस आधारित टोल कलेक्शन सिस्टीम सॅटेलाईट आणि ट्रॅकिंग सिस्टीमचा वापर करुन कारने प्रवास केलेले अंतर मोजते. या अंतरावर आधारित टोल आकारते. यामुळे टोल प्लाझाची गरज नाहीशी होते आणि प्रवाशांचा वेळही वाचतो.
