| सांगली समाचार वृत्त |
इस्लामपूर - शनिवार दि. १६ ऑगस्ट २०२५
इस्लामपूरच्या राजकीय वातावरणात शनिवारी रंगलेले शब्दांचे ‘महाभारत’ मोठ्या चर्चेचा विषय ठरले. राष्ट्रवादी (शरद पवार गट) चे आमदार रोहित पवार यांनी आपल्या ओघवत्या भाषणातून भाजप नेते चंद्रकांत पाटील यांचे कौतुक करताना, गोपीचंद पडळकरांवर अप्रत्यक्ष टीकेचे बाण सोडले. “खरे सोनं आणि बनावट बेन्टेक्स यातला फरक ओळखायला हवा,” अशा शब्दांत त्यांनी प्रहार केला.
🔹 चंद्रकांत पाटीलांचे सोन्यासारखे स्थान
रोहित पवारांनी चंद्रकांत पाटील यांचे कार्यकर्त्यांच्या प्रश्नांवर तातडीने प्रतिसाद देणारे, प्रामाणिक व समाजाभिमुख नेते म्हणून गौरवले.
🔹 बेन्टेक्सवर रोखठोक प्रहार
“आज सांगलीत काही बेन्टेक्स लोक फिरतात, ज्यांचा दर्जा फक्त स्वस्त टीकाटिप्पणीपर्यंतच मर्यादित आहे. अशा नकली दागिन्यांचं काय करायचं, हे चंद्रकांतदादांनीच ठरवावं,” असे ते म्हणाले.
🔹 अजित पवारांना दिलेला इशारा
“पूर्वी अगदी शर्टाच्या बटणापर्यंत लक्ष देणारे अजितदादा, आता गावकीच्या राजकारणात अडकून भावकी विसरत चालले आहेत,” अशा शब्दांत रोहित पवारांनी नाराजी व्यक्त केली.
🔹 क्रिकेटच्या मैदानावरून राजकीय खेळ
क्रिकेटच्या भाषेत उपमा देत त्यांनी अजितदादांना ‘फास्ट बॉलर’, चंद्रकांतदादांना ‘मीडियम पेसर’, तर जयंत पाटलांना ‘स्पिनचा जादूगार’ म्हणत राजकीय खेळीचे वेगळे चित्र रेखाटले. “आम्ही मात्र नवखे फलंदाज, जमेल तसे खेळण्याचा प्रयत्न करतोय,” असे म्हणत त्यांनी उपस्थितांना खळखळून हसवले.
