| सांगली समाचार वृत्त |
सांगली - सोमवार दि. १८ ऑगस्ट २०२५
समाजसेवेच्या वाटचालीला दिशा देणारे, असंख्य उपक्रमांतून प्रेरणा देणारे स्व. बाळासाहेब गलगले यांच्या स्मृतीप्रीत्यर्थ स्थापन झालेल्या ल.वि. तथा बाळासाहेब गलगले फाऊंडेशनतर्फे यंदाचा वार्षिक ‘स्मृती सेवा पुरस्कार’ जाहीर झाला आहे. या पुरस्कारांमधून समाजाच्या विविध क्षेत्रांत उल्लेखनीय कार्य करणाऱ्या मान्यवरांचा सन्मान होणार आहे.
फाऊंडेशनचे अध्यक्ष सुहास कुलकर्णी यांनी पत्रकार परिषदेत विजेत्यांची घोषणा करताना सांगितले की – “या पुरस्कार सोहळ्याचा हेतू म्हणजे कार्यकर्त्यांच्या समर्पणाचा गौरव आणि भावी पिढ्यांसाठी प्रेरणादायी दीपस्तंभ प्रज्वलित करणे.”
✨ यंदाचे पुरस्कार विजेते
धर्मरक्षक पुरस्कार – जतचे आमदार गोपीचंद पडळकर
नगरसेवा पुरस्कार – मिरजेचे माजी नगरसेवक पांडुरंग कोरे
वृत्तसेवा पुरस्कार – दैनिक सकाळचे सहयोगी संपादक शेखर जोशी
सहकार सेवा पुरस्कार – बाबची (ता. जत) येथील उदयराव यादव
क्रीडासेवा पुरस्कार – करगणीचे तरुण खेळाडूव्रती सचिन खिलारे
शाहीर सेवा पुरस्कार – कवठेमहांकाळचे लोककला साधक अविष्कार देशिगे
पर्यावरण सेवा पुरस्कार – सांगलीतील पर्यावरणप्रेमी डॉ. मनोजकुमार पाटील
🌿 पुरस्कार सोहळा
२४ ऑगस्ट २०२५, रविवार, संध्याकाळी ५ वाजता सांगली-कोल्हापूर मार्गावरील दैवज्ञ भवन येथे हा भव्य सोहळा पार पडणार आहे.
प्रमुख पाहुणे म्हणून पिंपरी-चिंचवडचे आमदार महेशदादा लांडगे उपस्थित राहतील.
कार्यक्रमाच्या अध्यक्षस्थानी भाजपाचे ज्येष्ठ नेते आण्णासाहेब डांगे विराजमान होतील.
या प्रसंगी मिरजेचे आमदार सुरेशभाऊ खाडे, सांगलीचे आमदार सुधीरदादा गाडगीळ, शिराळ्याचे आमदार सत्यजीतभाऊ देशमुख, तसेच आमदार सदाभाऊ खोत यांच्या उपस्थितीने कार्यक्रमाला विशेष उंची लाभणार आहे.
🌟 पत्रकार बैठकीतील उपस्थिती
या पत्रकार बैठकीस उपाध्यक्ष अरुण गहने, ॲड. बाळासाहेब देशपांडे, श्रीकांत तात्या शिंदे, विजय कडणे, शाहीर नामदेव आलासे, रबिंद बादवणे, संकेत कुलकर्णी, अतुल कुलकर्णी, सुभाष कलगुटगी, विनायक भोसले, भालबंद्र बक्षी आदी मान्यवर उपस्थित होते.
