| सांगली समाचार वृत्त |
नवी दिल्ली - मंगळवार दि. १० जून २०२५
जर तुम्ही घर घेण्याचा विचार करत असाल आणि होम लोनची योजना आखत असाल, तर सध्याचा काळ तुमच्यासाठी अत्यंत अनुकूल ठरू शकतो. कारण रिझर्व्ह बँकेने (RBI) 7 जून रोजी महत्त्वाचा निर्णय घेत, रेपो दरात 0.50% इतकी घट केली असून तो आता केवळ 5.5% इतका राहिला आहे. फेब्रुवारी 2025 पासून एकूण 1% इतकी कपात करण्यात आली आहे. याचा थेट लाभ गृहकर्ज घेणाऱ्यांना मिळू लागला आहे.
कर्ज घेणाऱ्यांना दिलासा – बँकांचे व्याजदर कमी
रेपो रेट कमी झाल्यानंतर देशातील अनेक प्रमुख बँकांनी त्यांच्या कर्ज दरात घट केली आहे. त्यामुळे आता होम लोन घेणे केवळ सुलभच नव्हे तर किफायतशीर ठरत आहे. ही कपात केवळ नव्या ग्राहकांसाठी मर्यादित नसून, आधीच कर्ज घेतलेल्या व्यक्तींनाही याचा फायदा मिळणार आहे.
बँक ऑफ बडोदा ने आपला रेपो लिंक्ड लेंडिंग रेट (RLLR) 0.50% ने कमी करून 8.15% केला आहे. त्यामुळे आता होम लोन केवळ 8% दराने उपलब्ध आहे.
पंजाब नॅशनल बँक (PNB) नेही ग्राहकांना दिलासा दिला असून, RLLR 8.85% वरून 8.35% पर्यंत खाली आणला आहे. हा नवीन दर 9 जूनपासून लागू होणार आहे. यामुळे होम लोन केवळ 7.45% पासून सुरू होत आहेत. वाहन कर्जासाठी व्याजदर 7.80% ठेवण्यात आला आहे.
बँक ऑफ इंडिया नेदेखील RLLR 8.35% वर आणत 0.50% ची कपात केली आहे. याचा थेट फायदा नवीन तसेच विद्यमान कर्जदारांना EMI कमी स्वरूपात मिळणार आहे.
युको बँकेने MCLR (मार्जिनल कॉस्ट बेस्ड लेंडिंग रेट) मध्ये 10 बेसिस पॉइंट्सची कपात केली असून, हा निर्णय 10 जूनपासून अंमलात येणार आहे.
घराचे स्वप्न आता अधिक जवळ
रिझर्व्ह बँकेने सलग तिसऱ्यांदा घेतलेल्या रेपो दर कपातीच्या निर्णयामुळे आता गृहकर्ज स्वस्त झाले असून, EMI मध्येही घट झाली आहे. त्यामुळे घर खरेदीचा विचार करणाऱ्यांसाठी हीच सुवर्णसंधी आहे.
