पुणे-मिरज रेल्वेमार्गावर शेतकऱ्यांचा ठिय्या आंदोलन, सहा तास रेल्वे सेवा विस्कळीत !

फोटो सौजन्य : दै. पुढारी

| सांगली समाचार वृत्त |

सांगली - दि. १४ मे २०२५

वसगडे (ता. पलूस) येथील शेतकऱ्यांनी आपली नुकसानभरपाई मिळावी आणि सेवा रस्त्याची मागणी मान्य व्हावी यासाठी मंगळवारी पुणे-मिरज रेल्वेमार्गावर ठिय्या आंदोलन छेडले. तब्बल सहा तास चाललेल्या या रेल रोकोमुळे पुणे ते मिरज रेल्वे मार्गावरील वाहतूक पूर्णतः ठप्प झाली होती.

शेतकऱ्यांनी आधी डिझेल वॅगन थांबवली, त्यानंतर पुणे-कोल्हापूर डेमू गाडी अडवली. आंदोलनामुळे अनेक गाड्या वेळेवर पोहोचू शकल्या नाहीत. अखेर गुरुवारी वरिष्ठ अधिकाऱ्यांसोबत बैठक घेण्याचे आश्वासन दिल्यानंतर हे आंदोलन तात्पुरते मागे घेण्यात आले.

जमिनी गेल्या, मोबदला नाही

पुणे-मिरज-लोंढा रेल्वेमार्गाच्या दुहेरीकरणात वसगडे परिसरातील अनेक शेतकऱ्यांच्या जमिनी घेतल्या गेल्या, मात्र अजूनही त्यांना मोबदला मिळालेला नाही. शिवाय रेल्वेमार्गालगतच्या शेतांमध्ये जाण्यासाठी सेवा रस्त्याचीही सोय केलेली नाही. याविरोधात शेतकरी गेल्या चार-पाच वर्षांपासून सातत्याने लढा देत आहेत.

पूर्वीही आंदोलन, तरीही दुर्लक्ष

या संदर्भात शेतकऱ्यांनी यापूर्वीही आंदोलन केले होते. दीड वर्षांपूर्वी गोंदिया-कोल्हापूर एक्स्प्रेस चार तास रोखली होती. त्यावेळी दिलेल्या आश्वासनांनंतर आंदोलन थांबवण्यात आले. नंतर चार वेळा बैठकाही झाल्या, मात्र ठोस निर्णय झाला नाही. जिल्हाधिकाऱ्यांनीही रेल्वे प्रशासनाला सूचना दिल्या, परंतु त्याला प्रतिसाद मिळाला नाही.

पुन्हा 'रेल रोको'चा इशारा

एप्रिलमध्ये झालेल्या बैठकीत 5 मेपर्यंत प्रस्ताव सादर करण्याचे आदेश रेल्वेला देण्यात आले, पण त्यावरही कारवाई झाली नाही. त्यामुळे शेतकऱ्यांनी 14 मे रोजी मुदत देऊनही प्रतिसाद न मिळाल्याने मंगळवारी प्रत्यक्षात रेल्वेमार्गावर ठिय्या दिला.

प्रवाशांची मोठी गैरसोय

आंदोलनामुळे कोल्हापूर, मुंबई, गोवा, मैसूरसह अनेक रेल्वेगाड्यांचे वेळापत्रक कोलमडले. काही गाड्या भिलवडी व किर्लोस्करवाडी स्थानकांवर तासन्तास थांबवण्यात आल्या. यामुळे प्रवाशांचे प्रचंड हाल झाले. पुणे-कोल्हापूर डेमूमध्ये अडकलेल्या प्रवाशांना शेतकऱ्यांनीच खाण्यापिण्याची व्यवस्था करून मदतीचा हात दिला.

"हक्काची लढाई, आमच्या जमिनीवरच आंदोलन"

शेतकऱ्यांनी स्पष्ट केले की, ही जमीन त्यांच्या मालकीची असून, मोबदला न देता रेल्वेने ती ताब्यात घेतली. त्यामुळे आम्ही आमच्या जमिनीवरच शांततापूर्ण आंदोलन करत आहोत. अधिकारी प्रत्यक्ष भेट घेत नाहीत, तोपर्यंत आंदोलन मागे घेणार नाही, असा ठाम पवित्रा आंदोलकांनी घेतला.

आश्वासनानंतर तात्पुरते आंदोलन मागे

रात्री उशिरा आलेल्या अधिकाऱ्यांनी गुरुवारी बैठक घेण्याचे आश्वासन दिल्यामुळे आंदोलन थांबवण्यात आले. डेमू गाडी त्यानंतर मार्गस्थ झाली. मात्र शेतकऱ्यांनी इशारा दिला आहे की, याहीवेळी निर्णय न झाल्यास पुन्हा आंदोलन छेडले जाईल.