| सांगली समाचार वृत्त |
सांगली - दि. २५ ऑक्टोबर २०२४
सांगली विधानसभा मतदारसंघातून आज भाजपचे विद्यमान आमदार सुधीरदादा गाडगीळ तर मिरजेतून सुरेशभाऊ खाडे यांनी आपला उमेदवारी अर्ज दाखल केला. आज गुरुपुष्य असल्याने हा मुहूर्त साधण्यासाठी सांगली जिल्ह्यातील ८ मतदारसंघात १८ जणांनी आपले उमेदवारी अर्ज दाखल केले.
आ. सुधीरदादा गाडगीळ यांना उमेदवारी जाहीर झाल्यानंतर भाजपामध्ये काही नाराजी निर्माण झाली होती. मात्र आज केंद्रीय मंत्री मुरलीधर मोहोळ यांच्याहस्ते प्रचार कार्यालयाचे उ‌द्घाटन करण्यात आले. त्यामुळे मी नाराजी दूर झाल्याचे दिसून येत आहे. सुधीरदादा यांचा अर्ज भरण्यासाठी शेखर इनामदार, माजी आमदार दिनकर पाटील यांच्यासह भाजपचे अनेक कार्यकर्ते हजर होते. केवळ उमेदवारीसाठी इच्छुक असलेले शिवाजी उर्फ पप्पू डोंगरे यांचे अनुपस्थिती मात्र सर्वांनाच जाणवली. त्यामुळे ते बंडखोरी करून सुधीरदादांसमोर आव्हान उभे करणार ? की माघारीच्या दिवसापर्यंत त्यांची नाराजी दूर करण्यात पक्ष नेतृत्वाला यश येणार ? अशी चर्चा यावेळी उपस्थित असलेल्या कार्यकर्त्यांमध्ये सुरू होती.
दरम्यान विधानसभा सार्वत्रिक निवडणूक-२०२४ साठी नामनिर्देशन पत्रे दाखल करण्याच्या तिसऱ्या दिवशी आज जिल्ह्यातील सर्व ८ मतदारसंघांतील १८ उमेदवारांची एकूण २४ नामनिर्देशन पत्रे दाखल झाली. ही माहिती संबंधित मतदारसंघाचे निवडणूक निर्णय अधिकारी यांनी दिली. तिसन्या दिवशी दाखल नामनिर्देशनपत्रांची व विक्रीची माहिती पुढीलप्रमाणे,
मिरज (अ.जा.)-डॉ. सुरेश (भाऊ) दगडू खाडे (भारतीय जनता पार्टी), मकरंद भागवत कांबळे (अपक्ष), ज्योती जयपाल कांबळे (अपक्ष)
सांगली - धनंजय हरी गाडगीळ (भारतीय जनता पार्टी), धनंजय हरी गाडगीळ (भारतीय जनता पार्टी)
इस्लामपूर-निशीकांत प्रकाश पाटील (भारतीय जनता पार्टी), जयंत राजाराम पाटील (नॅशनॅलिस्ट काँग्रेस पार्टी-शरदचंद्र पवार). जयंत राजाराम पाटील (नॅशनॅलिस्ट काँग्रेस पार्टी-शरदचंद्र पवार)
शिराळा-अजित रंगराव आलुगडे (अपक्ष), सम्राट विजयसिंह शिंदे (अपक्ष), रवि भगवानराव पाटील (अपक्ष)
पलूस-कडेगाव - संग्राम संपतराव देशमुख (भारतीय जनता पार्टी), संग्राम संपतराव देशमुख (अपक्ष), प्रदिप विलास कदम (शिवसेना / अपक्ष), रविंद्र हरीबा ठोंबरे (अपक्ष)
खानापूर - वैभव प्रतापराव पाटील (अपक्ष), सुहास अनिलराव बाबर (शिवसेना), सुहास अनिलराव बाबर (शिवसेना), संभाजी जगन्नाथ पाटील (अपक्ष)
तासगाव-कवठेमहांकाळ-रोहित रावसाहेब पाटील (नॅशनॅलिस्ट काँग्रेस पार्टी-शरदचंद्र पवार)
जत- विक्रमसिंह बाळासो सावंत (इंडियन नॅशनल काँग्रेस), प्रकाश विठोबा जमदाडे (भारतीय जनता पार्टी), विक्रमसिंह बाळासो सावंत (इंडियन नॅशनल काँग्रेस), विक्रमसिंह बाळासो सावंत (अपक्ष)
नामनिर्देशन पत्र भरण्याची अंतिम तारीख मंगळवार दि. २९ ऑक्टोबर २०२४ असून नामनिर्देशन पत्राची छाननी बुधवार दि. ३० ऑक्टोबर २०२४ होणार आहे. उमेदवारी अर्ज मागे घेण्याची तारीख सोमवार दि. ४ नोव्हेंबर २०२४ आहे. दि. २० नोव्हेंबर २०२४ रोजी मतदान होणार आहे. तर मतमोजणी शनिवार दि. २३ नोव्हेंबर २०२४ रोजी होणार आहे. निवडणूक प्रक्रिया पूर्ण करण्याची अंतिम तारीख सोमवार दि. २५ नोव्हेंबर २०२४ आहे.
