| सांगली समाचार वृत्त |
मुंबई - दि. २५ ऑक्टोबर २०२४
गेली अनेक दिवस वादाच्या भोवऱ्यात असलेली काँग्रेसची ४८ उमेदवारांची पहिली यादी तर राष्ट्रवादी शरद पवार पक्षाची ४५ उमेदवारांची यादी आज जाहीर करण्यात आली असून त्यात बहुतांश विद्यमान आमदारांचा समावेश आहे. या यादीत काँग्रेसकडून सांगली जिल्ह्यातील पलूस-कडेगाव मधून विद्यमान आमदार विश्वजित कदम तसेच जतचे विद्यमान आमदार विक्रम सावंत यांचा समावेश आहे. तसेच राष्ट्रवादीच्या यादीत इस्लामपूरमधून प्रदेशाध्यक्ष जयंत पाटील तर शिराळ्यातून मानसिंगराव नाईक आणि तासगाव-कवठेमहांकाळातून रोहित आर. पाटील यांचा समावेश आहे. मात्र ज्याठिकाणी महाविकास आघाडीत वादाचा विषय आहे. तसेच काँग्रेसमध्ये अंतर्गत वाद आहे अशा सांगली मतदारसंघात अद्याप कोणालाही उमेदवारी जाहीर करण्यात आली नाही. उर्वरित काँग्रेसची यादी उद्या जाहीर होण्याची शक्यता आहे.
आज जाहीर झालेल्या काँग्रेसच्या यादीमध्ये साकोलीमधून नाना पटोले, कराड दक्षिण मधून पृथ्वीराज चव्हाण, ब्रह्मपूरीतून विजय वडेड्डीवार, तिवसातून यशोमती ठाकूर, लातूरमधून अमित देशमुख, कोल्हापूर दक्षिणमधून ऋतूराज पाटील, करवीरमधून राहूल पाटील, हातकणंगलेतून राजू आवळे, भोरमधून संग्राम थोपटे, संगमनेरमधून विजय बोरात, लातुर ग्रामीणमधून पिरज देशमुख आदींचा समावेश आहे.
महाविकास आघाडीतील राष्ट्रवादी काँग्रेसच्या शरद पवार पक्षाची पहिली ४५ उमेदवारांची अधिकृत यादी जाहीर करण्यात आली आहे. त्यामध्ये, शिवसेना ठाकरे गटाप्रमाणेच शरद पवारांनीही राष्ट्रवादीच्या अजित पवारांना तगडं आव्हान दिलंय, सर्वांचं लक्ष लागलेल्या बारामती विधानसभा मतदारसंघात थेट अजित पवार विरुद्ध युगेंद्र पवार म्हणजेच काका विरुद्ध पुतण्या अशी लढत होणार आहे. तर, मंत्री धर्मराव आत्राम यांच्याविरुद्ध त्यांच्या लेकीलाच शरद पवारांनी मैदानात उतरवलं आहे. अहेरी मतदारसंघातून भाग्यश्री आत्राम यांना उमेदवारी जाहीर झाली आहे. त्यामुळे, महायुती विरुद्ध महाबिकास आघाडीच्या लढाईत पडवाळाला तुतारीचं मोठं आव्हान निर्माण झालंय.
गडचिरोली-चिमूर लोकसभा मतदारसंघात सहा विधानसभा क्षेत्र आहेत, त्यापैकीच एक म्हणजे अहेरी विधानसभा मतदारसंघ, या मतदारसंघाचे राजकीय दृष्टिकोनातून वेगळे महत्व आहे. त्यामुळे युती असो की आघाडी, या दोघांनीही अहेरी मतदारसंघावर लक्ष केंद्रित केलं आहे.
पूर्वी गडचिरोली जिल्ह्यात राष्ट्रवादी काँग्रेस पक्ष म्हणजे धर्मरावबाबा आत्राम असे समीकरण होते. मात्र, आत्राम यांनी आता अजित पवारं गटात प्रवेश केल्यानंतर त्यांची कन्या भाग्यश्री आत्राम हलगेकर यांनी राष्ट्रवादी काँग्रेस शरद पवार गटात प्रवेश केला. आत्राम कुटुंबातील ह्या घरफुटीमुळे जिल्ह्यातील राजकीय समीकरणं देखील पूर्णपणे बदलली आहेत. अखेर आज शरद पवारांच्या राष्ट्रवादीची उमेदवारी जाहीर झाली असून बाप विरुद्ध लेक असा सामना फिक्स झालंय, तर, बारामती मतदारसंघातून युगेंद्र पवार यांना तिकीट देऊन अजित पवारांना मोठं आव्हान उभा केलंय. त्यामुळे, राज्याचं लक्ष वा मतदारसंघातील लढतीकडे लागणार आहे.
राष्ट्रवादी काँग्रेस शरद पवार पक्षाची यादी : जयंत पाटील इस्लामपूर, अनिल देशमुख- काटोल, राजेश टोपे - घनसावंगी, बाळासाहेब पाटील - कराड उत्तर, जितेंद्र आव्हाड - कळबा मुंब्रा, शशिकांत शिंदे - कोरेगाव, जयप्रकाश दांडेगावकर- वसमत, गुलाबराव देवकर- जळगाव ग्रामीण, हर्षवर्धन पाटील- इंदापूर, प्राजक्त तनपुरे - राहुरी, अशोकराव पवार- शिरुर, मानसिंगराव नाईक- शिराळा, सुनील भुसारा - विक्रमगड, रोहित पवार - कर्जत जामखेड, विनायकराव पाटील - अहमदपूर, राजेंद्र शिंगणे - सिंदखेडराजा, सुधाकर भालेराव - उदगीर, चंद्रकांत दानवे - भोकरदन, चरण वाघमारे- तुमसर, प्रदीप नाईक- किनवट, विजय भांबळे-जिंतूर, पृथ्वीराज साठे- केज, संदीप नाईक- बेलापूर, बापूसाहेब पठारे- वडगाव शेरी, दिलीप खोडपे - जामनेर, रोहिणी खडसे - मुक्ताईनगर, सम्राट डोंगरदिवे-मुर्तिजापूर, रविकांत बोपछे- तिरोडा, भाग्यश्री अत्राम - अहेरी, बबलू चौधरी - बदनापूर, सुभाष पवार - मुरबाड, राखी जाधव - घाटकोपर पूर्व, देवदत्त निकम- आंबेगाव, युगेंद्र पवार बारामती, संदीप वर्षे - कोपरगाव, प्रताप ढाकणे - शेवगाव, राणी लंके पारनेर, मेहबूब शेख- आष्टी, करमाळा-नारायण पाटील, महेश कोठे-सोलापूर शहर उत्तर, प्रशांत यादव- चिपळूण, समरजीत घाटगे - कागल, रोहित आर आर पाटील - तासगाव कवठेमहाकाळ, प्रशांत जगताप - हडपसर.
