महाविकास आघाडीत सांगली, भिवंडी आणि मुंबईतील काही जागा वाटपावरून अंतर्गत मतभेद झाले होते. यात सांगलीवरून शिवसेना (उद्धव बाळासाहेब ठाकरे) आणि काँग्रेसमध्ये प्रचंड ताणाताणी झाली. ठाकरे यांनी सांगलीतून चंद्रहार पाटील यांच्या उमेदवारीची परस्पर घोषणा केली. त्यामुळे आमदार विश्वजित कदम, इच्छुक उमेदवार विशाल पाटील, जिल्हाध्यक्ष आमदार विक्रम सावंत, जिल्हा मध्यवर्ती बँकेच्या उपाध्यक्षा जयश्रीताई पाटील, शहर जिल्हाध्यक्ष पृथ्वीराज पाटील यांनी थेट दिल्ली गाठून सांगलीची उद्धव ठाकरे यांची मे रोजी सभा जागा सोडू नये, अशी मागणी केंद्रीय नेत्यांकडे केली होती. विश्वजित कदम यांनी मुंबईमध्ये प्रदेश काँग्रेसच्या नेत्यांची आणि नागपूरमध्ये महाराष्ट्र प्रभारी रमेश चेन्नीथाला यांचीही भेट घेतली होती.
मात्र हा चेंडू सोनिया गांधी यांच्या कोर्टात असल्याचे सांगण्यात येत होते. ठाकरेंकडून सुरुवातीपासूनच याबाबत प्रदेश नेत्यांशी कोणतीही चर्चा न करता राष्ट्रीय नेतृत्वाशी चर्चा केली जात होती. अशात माजी मुख्यमंत्री पृथ्वीराज चव्हाण आणि ज्येष्ठ नेते बाळासाहेब थोरात यांनी काल उद्धव ठाकरे यांची भेट मागितली होती. पण सांगलीच्या विषयावर प्रदेश नेत्यांशी कोणतीही चर्चा होणार नाही. आम्ही राष्ट्रीय नेत्यांशी याबाबत चर्चा केली आहे, असा निरोप ठाकरेंनी दिला. ठाकरेंनी भेट नाकारली याचा स्पष्ट अर्थ त्यांनी कोणत्याही तडजोडीला तयारी नसल्याचे संकेत दिले. त्यामुळे प्रदेश काँग्रेसच्या नेत्यांचे प्रयत्न अयशस्वी झाले आहेत.
या स्थितीत होत असलेल्या महाविकास आघाडीच्या बैठकीला प्रदेशाध्यक्ष नाना पटोले, विधिमंडळ गटनेते बाळासाहेब थोरात, माजी मुख्यमंत्री पृथ्वीराज चव्हाण आदी काँग्रेस नेते हजर राहणार आहेत. या बैठकीत राज्यातील ४८ उमेदवारांची नावे जाहीर करण्यात येणार आहेत. त्यात सांगलीतून चंद्रहार पाटील यांच्या नावाची घोषणा केली जाणार असल्याचे खात्रीशीर वृत्त आहे. याशिवाय दोन मे रोजी सांगलीमध्ये उद्धव ठाकरे यांची प्रचार सभाही होणार आहे. शिवसेना (उद्धव बाळासाहेब ठाकरे) पक्षाचे ‘मशाल’ हे चिन्ह लोकांपर्यंत पोहचवण्यासाठी आणि उमेदवाराच्या प्रचारासाठी ही सभा घेण्यात येणार आहे.
